کاروار: ریاستی بجٹ میں اترکنڑا ضلع کے لئےکوئی خاص امداد اور اسکیم کا نہیں ہوا اعلان
کاروار :18؍فروری (ایس اؤ نیوز )حالیہ پیش ہوئے ریاستی بجٹ میں اترکنڑا ضلع کے زراعت، سیاحت، ماہی گیری اور باغبانی سمیت بنیادی سہولیات کی ترقی کےلئے خصوصی پیکیج یا پھر امداد کی جوتوقع تھی وہ مایوسی میں تبدیل ہوگئی ہے۔ یلاپور اور کروتی کےلئے آب پاشی کےسوا کوئی نئے منصوبے کا اعلان نہیں کیاگیا ہے۔
بجٹ میں اترکنڑا ضلع میں ماہی گیر تحقیقی مرکز کا قیام اور مرڈیشور کے نواح میں بندرگاہ کی تعمیر کا منصوبہ کا اعلان کیاگیا ہے۔ لیکن یہ دونوں منصوبے ایک ہی پیشہ کےلوگوں کو فائدہ دیں گے۔ ہمہ طبقات کو لبھانےوالے بجٹ میں اترکنڑا ضلع کےلئے صرف مایوسی ہاتھ آئی ہے۔
ماہی گیری کےلئے بہتر امداد تقسیم کی گئی ہے اور مرڈیشور میں ماہی گیر بندرگاہ کی تعمیر کے سوا اترکنڑا ضلع کےلئے کچھ بھی نہیں دیاگیا ہے۔ ضلع کا سب سےبڑا اوراہم مسئلہ سمندری کٹاؤکا مستقل حل ڈھونڈنے میں کوئی اعلان نہیں ہےاور پھر جاری منصوبے کو امدادفراہم نہیں کی گئی ہے۔ اترکنڑا ضلع میں کریٹیکل بلاک کاقیام ہوگا۔ سرسی میں سائنسی مرکز کاتعمیری کام ہوگا، ضلع کی زراعت، ماہی گیری اور سیاحت، صنعت کاری کی ترقی وغیرہ کو لےکر کافی امیدیں تھیں ان سب کو درکنا رکیاگیا ہے۔ مذہبی مراکز، بیچ، آبشارسمیت سیاحتی مقامات کو جوڑنے والے ٹوریزم سرکیوٹ کو مستحکم کرنے ترجیح نہیں دی گئی ہے۔ اسی طرح صنعتی علاقوں کی ترقی کےلئے کوئی خصوصی امداد بھی فراہم نہیں کی گئی ہے۔