بھٹکل کے رپورٹر پر قاتلانہ حملہ کا معاملہ : ملزموں کی گرفتاری اور قانونی کارروائی کا مطالبہ لےکر جرنلسٹ فیڈریشن کی جانب سے ڈی سی کو میمورنڈم
بھٹکل:25؍نومبر(ایس اؤ نیوز) بھٹکل کے کراولی سماچار ویب پورٹل کے مدیر ، رپورٹر ارجن ملیا پر نقاب پوشوں کے ذریعے گذشتہ جمعرات 18نومبر کی شام ہوئے قاتلانہ حملےکی مذمت کرتےہوئے اکھیل بھارت جرنلسٹ فیڈریشن اترکنڑا ضلع شاخ نے 6حملہ آوروں کی گرفتار ی کا مطالبہ لےکر اترکنڑا ضلع ڈپٹی کمشنر کے نام بھٹکل تحصیلدار کو میمورنڈم پیش کیا۔
میمورنڈم میں کہاگیا ہے کہ بھٹکل کے کراولی سماچار نامی ویب پورٹل کے مدیر ، رپورٹر 18نومبر 2021بروز جمعرات کی شام بھٹکل میونسپالٹی کی عمارت میں واقع اپنے دفتر سے بیلکے میں موجود اپنے گھر کی طرف لوٹ رہا تھا تو راستہ میں 6نقاب پوشوں نے ڈنڈوں اورلوہے کی سلاخوں سے قاتلانہ حملہ کیا ہے۔ واقعے کےدوران جب مقامی لوگ جائے وقوع پر پہنچے تو نقاب پوش حملہ آور فرار ہوگئے۔ ارجن ملیا پر کئے گئے حملے سے اس کا ہاتھ اور پیر ٹوٹ جانے سے بھٹکل سرکاری اسپتال میں ابتدائی علاج کے بعد زائد علاج کے لئے کنداپور کے پرائیویٹ اسپتال میں داخل کیاگیا ہے۔ معاملے کو لےکر بھٹکل دیہی پولس تھانےمیں کیس درج کیاگیا ہے۔
میمورنڈم میں کہاگیا ہےکہ گذشتہ چند مہینوں سے بھٹکل میں بغیر کسی خوف وڈر کے کھلم کھلا ہورہی غیر قانونی سرگرمیوں کے متعلق ارجن ملیا نے اپنے یوٹیوب چینل پر رپورٹ نشر کی تھی ۔ اسی رپورٹ سےمشتعل شرپسندوں نے ارجن ملیا پر حملہ کیا ہے۔ جرنلسٹ فیڈریشن اترکنڑا ضلع شاخ ڈی سی سے مطالبہ کرتی ہے کہ معاملے کو پولس محکمہ سنجیدگی سے لے کر سبھی 6 ملزموں کو گرفتار کرتےہوئے ان پر سخت قانونی کارروائی کرے۔ اسی طرح ارجن ملیا اور اس کے خاندان والوں کو حفاظت مہیا کی جائے۔ اس موقع پر اترکنڑا ضلع صدر کمار نائک، بھٹکل شاخ کےصدر جئیوتم پائی ، رام چندر گونڈو غیرہ موجود تھے۔