کاروارمیں مزدور خاتون کو ملے ایک لاکھ روپئے؛ ایمانداری سے لوٹائے واپس : غریب بیوہ کی شہر بھر میں ہورہی ہے ستائش
کاروار:8؍اگست(ایس اؤ نیوز) سڑک پر پڑے ہوئے ایک لاکھ روپئے کو ایک مزدور بیوہ خاتون نے اصلی فرد کو واپس لوٹاتے ہوئے ایمانداری کا بہترین نمونہ پیش کیا ہے۔ یہ واقعہ کاروار میں بدھ کو پیش آیا۔
ذرائع نے بتایا کہ سداشیو گڑھ کے ناخدا محلے کی خاتون بی بی جان کاروار کے کئی گھروں میں کام کرتی ہیں، پچھلےپیر کی دوپہر بی بی جان جب گرین اسٹریٹ سے گزر رہی تھیں تو اشوک ہوٹل کے قریب والی سڑک پر اُسے ایک پلاسٹک بیگ ملی جس میں دوہزار نوٹوں کا ایک گٹھانظر آرہا تھا۔ بی بی جان نے اس کو اٹھایا اور اپنے شناسا ایک موز کے بیوپاری سلیمان کے پاس پہنچیں اور اسے ماجرا بتایا۔ سلیمان نے بی بی جان کو لےکر ہوم اپلائینسس کے مالک کو سونپتے ہوئےکہا کہ وہ اس رقم کو اصلی مالک تک پہنچائیں۔
اس دوران پتہ چلا کہ سنیل کمار نامی ایک شخص شہر کے سبھی پھول بیوپاریوں سے رقم جمع کرکے اپنے مالک کے اکاؤنٹ میں جمع کرانے کے لئے جب ایک لاکھ روپئے لے کر کینرا بینک پہنچا، تو معلوم ہوا کہ اس کی جیپ میں رکھا ہوا پیسوں کا گٹھا ہی غائب ہے۔ وہ بے حد پریشان ہوگیا اور اُس نے اپنی پریشانی دوسروں کو بتائی۔
واقعہ کی خبر ملتے ہی ہوم اپلائنس کے مالک نے سنیل کمار سے رابطہ کیا اور اُس کی ایک لاکھ کی رقم اُسے واپس لوٹادی۔ جب یہ بات سنیل کمار کو معلوم ہوئی کہ یہ رقم ایک غریب بیوہ عورت کو ملی تھی اور اُس نے ایمانداری سے یہ رقم واپس لوٹائی ہے تو تمام پھول بیوپاریوں نے متعلقہ خاتون کی ستائش کرتے ہوئے اپنی طرف سے بی بی جان کو 10ہزارروپئے کے انعام کا اعلان کیا۔ شہر کے ذمہ داران ابراہیم کلور، الطاف شیخ ، کھادی ملا مالک، سلیمان ، رابعہ پلازہ کے مالک امتیاز بخاری وغیرہ سبھوں نے مل کر بی بی جان کو انعام کی رقم سونپی۔ بیوہ عورت کی ایمانداری کی شہر بھر میں خاطر خواہ ستائش کی جارہی ہے ، کئی اداروں اور تنظیموں کی طرف سے بھی خاتون کی تہنیت کرنے اور انعامات سے نوازنے کے لئے پروگرام طئے کئے گئے ہیں۔
