کاروار :25؍ جنوری  (ایس اؤ نیوز ) منصوبہ جات مزدوروں کی تنخواہ طئے کرنا اور ملازمت کو مستقل کرنے جیسے مختلف مطالبات لےکر یوجنا نوکرر سنگھ اور سی آئی ٹی یو ضلع شاخ کی جانب سے ایم پی دفتر کو گھیراؤ ڈالنے والے تین روزہ احتجاج کی شروعات ہوئی ۔

شہر کےمالادیوی میدان سے شروع ہوئی مزدوروں کی ریلی میں سیکڑوں کارکنان شریک ہوئے۔ اہم راستوں سے گزرتے ہوئے ریلی ڈی سی دفتر پہنچی۔ چونکہ ایم پی کادفتر، ڈی سی دفتر سے متصل ہے تو احتجاجیوں نے ڈی سی دفتر کے سامنے جمع ہوکر اپنے مطالبات کو حل کرنے کو لےکر نعرے بازی کی۔ مزدوروں نے الزام لگایا کہ جن منصوبہ جات کو مرکزی حکومت نے منظوری دی ہے انہی منصوبہ جات کی امداد میں کمی کرتے ہوئے ناانصافی کی گئی  ہے۔

احتجاج کی قیادت کررہی سی آئی ٹی یو کی ریاستی جنرل سکریٹری یمونا گاؤنکر نے کہاکہ کروڑپتی سرمایہ داروں اور صنعت کاروں کے ٹیکس کو معاف کرنےو الی مودی کی قیادت والی مرکزی حکومت کو غریب گھرانوں کی عورتیں نظر نہیں آرہی ہیں۔ سرمایہ داروں کو معاشی  تحفظ دینے والی مرکزی حکومت میں اتنی انسانیت بھی نہیں ہے کہ وہ  منصوبہ جات کے ذریعے  مزدوروں کے روزگار کو تحفظ دے۔ یمونا نے ایم پی دفتر کے بند رہنے پر سخت  ناراضگی ظاہر کرتےہوئے کہاکہ جس دفتر کو عوامی مطالبات اور شکایتوں کے لئے کھلا رہنا تھا وہ ہمیشہ بند رہتی ہے۔ تو عوام کہاں جائیں ا۔ احتجاج میں سی آئی ٹی یو کے ضلعی صدر تلک گوڈا، جئے شری ہیریکر، ودیا وئیدیا، للتا ہیگڈے ، گیتا نائک وغیرہ شریک تھے۔