کرناٹک میں 21 جون سے کورونا لاک ڈاون میں مزید راحت کا اعلان؛ شام پانچ بجے تک تمام دکانوں کو کھولنے کی اجازت؛ پبلک ٹرانسپورٹ پر سے بھی پابندی ہٹی
بنگلور 19 جون (ایس او نیوز) کووِڈ لاک ڈاون میں اب 21 جون بروز پیر سے 5 جولائی تک مزید چھوٹ دینے کا اعلان کیا گیاہے۔ سنیچر شام کو کرناٹک کے وزیراعلیٰ یڈ یورپا نے اخبارنویسوں سے گفتگو کرتے ہوئے بتایا کہ کرناٹکا میں آن لاک 2.0 بنگلور اربن، اُترکنڑا، بیلگاوی، منڈیا، کوپّل، چکبالاپور، ٹمکور،کولار، گدگ، رائچور، باگلکوٹ، کلبرگی، ہاویری، رام نگر، یادگیر اور بیدر اضلاع میں جاری کیا جائے گا۔ ان تمام 16 اضلاع میں تمام دکانوں کو پیر 21 جون سے شام پانچ بجے تک کھولنے کی اجازت ہوگی۔ البتہ دیگر اضلاع میں چونکہ کورونا کے معاملات زیادہ ہیں، اس چھوٹ سے متشنیٰ ہوں گے اور پہلے کی طرح ہی لاک ڈاون جاری رہے گا۔
اعلان شدہ 16اضلاع میں پبلک ٹرانسپورٹ، بس سروس اور میٹرو سروس کو 50 فیصد مسافروں کے ساتھ کھولنے کی اجازت رہے گی، اسی طرح سرکاری اور پرائیویٹ دفاتر بھی 50 فیصد اسٹاف کے ساتھ کھولے جاسکیں گے۔ بغیر شراب والے اور بغیر ائیرکنڈیشن والے ہوٹل، کلب اور ریسٹورینٹ بھی شام پانچ بجے تک کھول سکیں گے۔ جبکہ جِم (بغیر ائیرکنڈیشن) اور لاڈجنگ اور ریسارٹ 50 فیصد اسٹاف کے ساتھ کھولے جاسکیں گے۔ اسٹڈیم میں کھیل کے پروگرام رکھے جاسکیں گے مگر شائقین کے بغیر ہی کھیلوں کا انعقاد کرنا ہوگا۔
شام 7 بجے سے صبح 5 بجے تک شام کا کرفیو جاری رہے گا، اسی طرح ہفتہ واری (ویکینڈ کرفیو) یعنی جمعہ شام سات بجے سے پیر صبح پانچ بجے تک کرفیو جاری رہے گا۔