’کسان مخالف‘ پالیسیوں کے خلاف کل 28ستمبر کومنایا جائے گا مکمل’ کرناٹکابند ‘ مینگلور اور اڈپی میں بھی احتجاجی مظاہرہ ہوگا، بعض جگہوں پر راستہ روکو کا پلان
بھٹکل،27؍ستمبر (ایس او نیوز) ’رعیت سنگھا ‘اور ’ہسیرو سینا‘کے ریاستی صدر کوڈیہلّی چندرا شیکھر کے بیان کے مطابق مرکزی اور ریاستی حکومت کی ’کسان مخالف‘پالیسیوں کے خلاف کل 28 ستمبر کو ’مکمل کرناٹکابند ‘منایا جائے گا۔ریاستی اور مرکزی حکومت کی وجہ سے کسانوں کی موت اجاگر کرنے کے لئے اس موقع پر ’علامتی لاش‘ کا جلوس بھی نکالا جائے گا۔اور بنگلورو کے موریا سرکل پر کسانوں کی طرف سے احتجاجی مظاہرا کیا جائے گا۔
خیال رہے کہ مرکزی حکومت نے حال ہی میں کسانوں پر اثر انداز ہونے والے ’تحویل اراضی ‘ قانون، اے پی ایم سی قانون، اشیائے ضروریہ قانون، لیبر قانون، بجلی سربراہی قانون وغیر ہ میں ترمیمات کرتے ہوئے نئے بلس منظور کیے ہیں، اس کے خلاف شمالی ہندوستان بالخصوص پنجاب اور ہریانہ میں کسانوں کا زبردست احتجاج چل رہا ہے۔ اب کرناٹکا اسمبلی میں بھی ایسے بلس منظور کیے گئے ہیں۔ اسی پس منظر میں کسان تنظیموں نے کرناٹکا میں ایک دن کے مکمل بند کا اعلان کیا ہے جس کی تائید بہت ساری دوسرے تنظیموں نے کی ہے۔
اڈپی میں 14تنظیموں کی تائید: کمیونٹسٹ پارٹی آف انڈیا کے اڈپی ضلع سیکریٹری بال کرشنا شیٹی نے ایک اخباری کانفرنس سے خطاب کرتے ہوئے بتایا کہ اڈپی میں منعقدہ ایک میٹنگ میں کسان کانگریس ،کرناٹکا پرانت رعیت سنگھا، بھارتیہ راشٹریہ کانگریس، جنتادل سیکولر، دلت سنگھرش سمیتی ، سی پی آئی ایم، کرناٹکا راجہ دلت سنگھرش سمیتی، سہابالوے اڈپی، ویلفیئر پارٹی آف انڈیا، اڈپی ضلع مسلم اوکوٹا، کرناٹکا راشٹرا سمیتی، سی آئی ٹی یو، بھارتیہ کرسچین اوکوٹا، امبیڈکر سینا جیسی کُل 14 تنظیموں، پارٹیوں اور اداروں کی طرف سے کل ہونے والے بند کے لئے اپنی حمایت کا اعلان کیا ہے۔
جنوبی کینرا میں ہوگا راستہ روکو احتجاج: اخباری اعلانات کے مطابق کسان تنظیموں ، مزدور یونین اور دلت تنظیموں کے علاوہ دیگر اداروں کی حمایت سے کل ہونے والے کرناٹکا بند کے دوران جنوبی کینرا سمیت ریاست بھر میں احتجاجی مظاہرے اور’راستہ روکو ‘ پروگرام منعقد کیے جائیں گے۔کرناٹکا راجیہ رعیت سنگھا کے سیکریٹری روی کرن پونچ نے بتایا کہ منگلورو میں منی ودھان سودا کے قریب احتجاجی مظاہرا ہوگا ، جبکہ سولیا اور بی سی روڈ پر راستہ روکو احتجاج کیا جائے گا۔
