بھٹکل: یکم نومبر (ایس او نیوز) تعلقہ میں کنڑیگاس کا تہوار 63واں کرناٹکا راجیوتسوا بہت ہی شان وشوکت کے ساتھ منایاگیا ۔ تعلقہ کھیل میدان  میں منعقدہ پروگرام میں رکن اسمبلی سنیل نائک نے صدارت کرتے ہوئے کہاکہ منقسم کنڑا ریاست کو متحد کرتے ہوئے ایک ترقی یافتہ ریاست ہماراکرناٹکا ہے۔ہماری ریاست میں سبھی  ذات، نسل اور طبقہ  مل جل کررہنے سے ملک بھر میں ایک خاص اہمیت کی حامل ہے۔ کنڑیگاس جہاں بھی رہیں وہ کنڑیگاس بن کررہیں۔

بھٹکل اسسٹنٹ کمشنر ساجد ملا نے خطاب کرتے ہوئے کہاکہ کرناٹکا کو متحد کرنے والی جدوجہدکو  جنگ آزادی کی اہمیت حاصل ہونے کی بات کہی۔ کنڑا ساہتیہ پریشد بھٹکل کے صدر گنگادھر نائک نے خصوصی مقالہ پیش کرتے ہوئے کہاکہ کرناٹکا راجیو تسوا ہمارے تشخص کا تہوار ہے ۔ ریاست اور کنڑا زبان کو مزید کیسے ترقی دے سکتے ہیں ؟ اس ریاست کے مسائل کیا ہیں؟ چیلنجس کیا ہیں ؟ اس کے لئے ہمیں کیا کچھ کرنا ہے ان پر توجہ دینے کی بات کہی۔  

پروگرام میں ادیبہ پورنیما نائک،انتظامی امور میں کنڑا استعمال پر  نیو انگلش ہائی اسکول کے صدر مدرس ایم کے نائک، یکشگانا کے کیشوو آچاریہ نائک، نارائن نائک، موسیقی میں پلوی نائک، جانپد میں شنکر جوگی، وریندر شانبھاگ کو راجیوتسوا رنّا نامی اعزاز سے نوازتے ہوئے ان کی تہنیت کی گئی ۔ تحصیلدار وی این باڈکر نے استقبال کیاتو بی ای اؤ ایم آر منجی نے شکریہ اداکیا۔ استاد شری دھر شیٹھ نے نظامت کے فرائض انجام دئیے ۔

ڈائس پر بھٹکل بلدیہ کے نائب صدر کے ایم اشفاق، جالی پٹن پنچایت کے صدر آدم پنمبور، کے ڈی پی ممبر ایس ایم سید عبدالعظیم ، تعلقہ پنچایت ممبر ہنومنت نائک، ڈی وائی ایس پی ویلنٹائن ڈیسوزا، تعلقہ پنچایت افسر جے ڈی موروگوڈو، اے سی ایف بال چندر وغیرہ موجود تھے۔ ڈائس پروگرام کے بعد تعلقہ کے مختلف اسکولوں کے طلبا وطالبات نے ثقافتی پروگرام پیش کئے ۔ اس سے قبل نیو انگلش ہائی اسکول سے تعلقہ کھیل میدان تک جلوس نکالاگیا۔