منگلورو، 4 / مارچ (ایس او نیوز) شہر کے قریبی علاقہ کڈبا میں واقع  سرکاری پری یونیورسٹی کالج کے احاطے میں آج صبح  دو نقاب پوش لڑکوں نے طالبات پر تیزاب پھینکا جس کی وجہ سے ایک طالبہ سنگین طور پر زخمی ہوگئی جبکہ دیگر دو طالبات کو معمولی زخم آئے ہیں ۔
    
ذرائع سے ملی اطلاع  کے مطابق تیزابی حملہ کرنے والے ایک ملزم کو احاطے میں موجود دیگر طالب علموں نے پکڑ لیا اور اسے پولیس کے حوالے کیا ہے جس کا نام آبین (23 سال) بتایا گیا ہے۔
    
بتایا جاتا ہے کہ اس کا تعلق کیرالہ  سے  ہے اور وہ ایم بی اے کی پڑھائی کر رہا ہے ۔   دو ملزمین نے ایلینا سیبی، ارچنا اور امریتا کو نشانہ بنا کر ان کے اوپر اس وقت تیزاب پھینکا جب وہ امتحان دینے کی تیاری میں تھے ۔ زخمی طالبات کو فوری طور پر کڈبا کمیونٹی ہیلتھ سینٹر میں ابتدائی طبی امداد فراہم کرنے کے بعد منگلورو کے اسپتال میں منتقل کیا گیا جہاں ان کا علاج کیا جا رہا ہے ۔
    
معلوم ہوا ہے کہ محبت میں ناکامی کی وجہ سے ملزم نے تیزابی حملہ کیا تھا ۔ اس حملے میں شدید زخمی ہونے والی طالبہ کا تعلق بھی کیرالہ سے ہے اور وہ سیکنڈ پی یو سی میں زیر تعلیم ہے ۔ 
    
اس واردات کی اطلاع ملنے پر کڈبا پولیس کی ٹیم نے جائے وقوع پر پہنچ کر معائنہ کیا اور معاملہ درج کر لیا ہے ۔ تحقیقات جاری ہے ۔