لکھنؤ،30؍مئی (ایس او نیوز؍ایجنسی) اترپردیش کے وزیراعلیٰ یوگی آدتیہ ناتھ نے کورونا کے سبب بے وقت موت کا شکار ہونے والے صحافیوں کے پسماندگان کو دس دس لاکھ روپیے کا مالی تعاون مہیا کروانے کی ہدایات دیئے ہیں‘۔ سرکاری ذرائع نے بتایا کہ کورونا منیجمنٹ کے سلسلے میں ٹیم-9 کی میٹنگ میں یوگی نے یہ ہدایات جاری کیے۔ غور طلب ہے کہ کورونا کی دوسری لہر میں لکھنؤ سمیت اترپردیش کے دیگر اضلاع میں بڑی تعداد میں صحافی کورونا وائرس کے سبب ہلاک ہوئے تھے۔ صحافیوں کی ایسوسی ایشن نے وزیراعلیٰ سے ہلاک ہونے والے صحافیوں کے خاندانوں کو مالی تعاون دینے کی گزارش کی تھی۔

یوم صحافت کے موقع پر سی ایم یوگی کے اس فیصلے کی تعریف کرتے ہوئے منظور شدہ جرنلسٹ ایسوسی ایشن کے صدر ہیمنت تیواری، جنرل سکریٹری شیوشرن سنگھ اور جوائنٹ سکریٹری وجے ترپاٹھی نے کہا کہ کورونا وائرس کے شکار صحافیوں کی فہرست انہوں نے انتظامیہ کو سونپ دی تھی جبکہ کچھ کے بارے میں دستاویز کو جلد سونپ دیا جائے گا۔