بین الاقوامی پروازیں بدستور معطل ہیں: سعودی فضائی کمپنی
دبئی،15/جون (ایس او نیوز؍ایجنسی) سعودی عرب کی قومی فضائی کمپنی Saudia نے اس بات کی تصدیق کی ہے کہ تمام بین الاقوامی پروازیں ابھی تک تا حکم ثانی معطل ہیں۔ کمپنی کے مطابق مذکورہ پروازیں بتدریج بحال کی جائیں گی اور اس کا اعلان سرکاری ذرائع سے کر دیا جائے گا۔
سعودی ایئرلائنز نے ٹویٹر پر اپنے سرکاری اکاؤنٹ پر کی گئی ٹویٹ میں بتایا کہ اس وقت صرف اُن بین الاقوامی پروازوں کی اجازت ہے جو مملکت میں مقیم افراد کو واپس لانے کے لیے جا رہی ہیں۔ ان افراد نے باقاعدہ طور پر مملکت واپسی کی درخواست پیش کی تھی۔ ایک دوسری ٹویٹ میں کمپنی نے مزید بتایا کہ "پروازوں کی بحالی بتدریج عمل میں لائی جائے گی .. اور اس حوالے سے اعلان ہماری ویب سائٹ اور سوشل میڈیا اکاؤنٹس پر پوسٹ کر دیا جائے گا"۔
اس سے قبل سعودی ایئرلائنز نے گذشتہ روز اپنی اندرون ملک پروازوں کے شیڈول کا اعلان کیا تھا۔ اس حوالے سے کی گئی ٹویٹ میں بتایا گیا کہ جدہ اور حائل کے درمیان پروازوں کا آغاز پیر 15 جون سے ہو گا۔
سعودی سول ایوی ایشن کی جنرل اتھارٹی نے اتوار 31 مئی 2020 سے ملکی فضائی کمپنیوں کے ذریعے اندرون ملک پروازوں کا آپریشن دوبارہ شروع کیا تھا۔ یہ آپریشن کرونا وائرس سے بچاؤ کے سلسلے میں متعین کردہ احتیاطی اقدامات اور حفاظتی تدابیر کے مطابق شروع کیا گیا۔
اس موقع پر اتھارٹی نے واضح کیا تھا کہ اندرون ملک فضائی پروازوں پر پابندی کو بتدریج ختم کیا جائے گا۔ اس کا مقصد سعودی ہوائی اڈوں کے راستے مسافروں کا سفر محفوظ بنانا ہے۔ سول ایوی ایشن اتھارٹی نے مملکت کے تمام ہوائی اڈوں پر احتیاطی اقدامات اور حفاظتی تدابیر کو مکمل طور پر نافذ کر دیا ہے۔ اس سلسلے میں اسے وزارت صحت اور متعلقہ حکومتی اداروں کا تعاون حاصل ہے۔
سعودی سول ایوی ایشن اتھارٹی کے مطابق اندرون ملک فضائی پروازوں کا دوبارہ آغاز مرحلہ وار ہو گا۔ دو ہفتوں کے اندر تمام مقامات اس میں شامل ہو جائیں گے۔ پہلے مرحلے میں درج ذیل ہوائی اڈوں کا آپریشن شامل ہے : ریاض کا کنگ خالد انٹرنیشنل ایئرپورٹ، جدہ کا کنگ عبدالعزیز انٹرنیشنل ایئرپورٹ، دمام کا کنگ فہد انٹرنیشنل ایئرپورٹ، مدینہ منورہ کا پرنس محمد بن عبدالعزيز انٹرنیشنل ایئرپورٹ، قصیم کا پرنس نائف بن عبدالعزیز انٹرنیشنل ایئرپورٹ، ابہا انٹرنیشنل ایئرپورٹ، تبوک کا پرنس سلطان بن عبدالعزيز انٹرنیشنل ایئرپورٹ، جازان کا کنگ عبدالله بن عبدالعزيز انٹرنیشنل ایئرپورٹ، حائل انٹرنیشنل ایئرپورٹ، باحہ میں کنگ سعود ایئرپورٹ اور نجران ایئرپورٹ.
دوسرے مرحلے میں بيشہ، طائف، ينبع، حفر الباطن اور شرورہ کے ہوائی اڈے شامل ہیں۔
یاد رہے کہ سعودی عرب نے 21 مارچ 2020 کو اندرون ملک فضائی پروازوں کو معطل کر دیا تھا۔ یہ اقدام دنیا بھر میں کرونا کی وبا پھیل جانے کے تناظر میں کیا گیا۔ تاہم انسانی بنیادوں، ہنگامی صورت حال اور بیرون ملک سے مملکت واپسی کے خواہش مند شہریوں کے سفر کو اس فیصلے سے مستثنی رکھا گیا۔