منگلورو25/جولائی (ایس او نیوز)نیشنل ہائی وے 66پر اُلال پُل پر نیتراوتی ندی میں کو د کر خود کشی کرنے کی وارداتوں میں مسلسل اضافے کو دیکھتے ہوئے اس پر حفاظتی جالی لگوانے کا مطالبہ عوام کی جانب سے کیا جارہا تھا۔گزشتہ سال جولائی میں ’کافی ڈے‘ کے مالک سدھارتھ کی خودکشی کے بعد اس مطالبے میں شدت آگئی تھی اور سرکاری طور پر یہاں باڑھ لگانے کا وعدہ کیا گیا تھا۔
امسال 4جولائی کو رکن اسمبلی ویداویاس کامت نے800میٹر پل کے اطراف حفاظتی جالی لگوانے کے منصوبے کا افتتاح کیا، جسے پورا کرنے کے لئے تین ماہ کی میعاد طے کی گئی ہے۔ خیال رہے کہ یہاں پر دو پُل موجود ہیں جن میں سے ایک منگلورو شہر کی طرف آنے کے لئے ہے اور دوسرا تھوکٹو کی طرف جانے کے لئے ہے۔پُل پرچڑھ کر ندی میں کودنے اور خود کشی کرنے سے لوگوں کو روکنے کے لئے ان پلوں کے دونوں جانب5فٹ اونچی لوہے کی جالی لگائی جارہی ہے اور اس جالی پربھی چڑھنے سے روکنے کے لئے سب سے اوپر ایک فٹ اونچے خاردار تار لگائے جائیں گے جس کا سِرا پُل کی اندرنی مڑا ہوا ہوگا۔ اس کے علاوہ سی سی کیمرے ھی لگوائے جائیں گے۔ اطلاعات کے مطابق اب تک پُل کے ایک طرف 75%کام مکمل ہوگیا ہے۔اور بقیہ کام تین مہینے کی طے شدہ مدت میں تکمیل پانے کی توقع ہے۔