آئی ایم اے پونزی اسکیم میں لاکھوں روپیوں کی سرمایہ کاری کرکے برباد ہونے والوں کے لئے خوش خبری؛ منظم انداز میں قانونی لڑائی لڑنے بنگلور میں اسوسی ایشن کا قیام
بنگلور3/اکتوبر (ایس اونیوز) آئی مونیٹری ایڈوائزری عرف آئی ایم اے گروپ نامی پونزی اسکیم میں لوگوں کا کروڑوں روپیہ ڈوبنے کے بعد متاثرین نے اپنی رقومات کو واپس حاصل کرنے قانونی لڑائی لڑنے کا فیصلہ کیا ہے ۔ چونکہ چالیس سے پچاس ہزار لوگوں نے اس کمپنی میں اپنا سرمایہ لگایا ہے، اس لئے منظم ہوکر لڑائی لڑنے کےلئے ایک کمیٹی تشکیل دی گئی ہے اور اسے باقاعدہ رجسٹرڈ بھی کیا گیا ہے۔
کرناٹکا اے پی سی آر کے صدر ایڈوکیٹ عثمان پی، اے پی سی آر سکریٹری ایڈوکیٹ محمد نیاز سمیت کرناٹکا ہائی کورٹ کے سابق پبلک پروسیکوٹر اور معروف ہائی کورٹ وکیل ایڈوکیٹ بی ٹی وینکٹیش کی رہنمائی میں اب IMA Depositors Welfare Association (آئی ایم اے ڈپوزیٹرس ویلفئیر اسوسی ایشن) کے نام سے کمیٹی قائم کی گئی ہے اور کمیٹی میں آئی ایم اے سے متاثرہ لوگوں کو ممبرشپ دی جارہی ہے۔
اس تعلق سے بدھ کو بینگلور میں ایک میٹنگ کا انعقاد کیا گیا تھا جس میں عہدیداران کا انتخاب عمل میں آیا ہے۔ محترمہ ڈاکٹر سلیم النساء کو اس کمیٹی کا صدر منتخب کیا گیا ہے، اسی طرح سلیم احمد جنرل سکریٹری، نجمہ رفیق اور سفیر احمد خان جوائنٹ سکریٹری منتخب ہوئے ہیں ۔ ریاض احمد خان کو اس کمیٹی کا خازن مقرر کیا گیا ہے۔
اخبار نویسوں سے گفتگو کرتے ہوئے جوائنٹ سکریٹری جناب سفیر آصف خان نے بتایا کہ کرناٹکا اے پی سی آر کے زیر اہتمام متاثرین کو قانونی امداد فراہم کرنے کے تعلق سے گذشتہ ماہ جو اجلاس منعقد کیا گیا تھا، اُس میں ریاست بھر سے قریب 1800 لوگوں نے اپنے نام درج کروائے تھے، اُس کے بعد ہوئی میٹنگوں میں اس بات کا فیصلہ کیا گیا تھا کہ انفرادی طور پر قانونی جدوجہد کرنے سے ایک طرف لوگوں کا وقت ضائع ہوگا، اُسی طرح وکیلوں کے پیچھے پیسہ بھی برباد ہوگا۔ لہٰذا میٹنگ میں فیصلہ کیا گیا تھا کہ ایک کمیٹی تشکیل دے کر اور اُسے باقاعدہ رجسٹرڈ کرکے کمیٹی کے ذریعے ہی قانونی لڑائی لڑنے کی ضرورت ہے، اُسی کی مناسبت سے کمیٹی ترتیب دے کر عہدیداران کا انتخاب عمل میں آیا ہے۔ انہوں نے کہا کہ اس کمیٹی کو ہائی کورٹ کے سنئیر وکلاء بالخصوص اے پی سی آر کی بھرپور حمایت حاصل ہے۔
سفیر آصف خان نے آئی ایم اے سے متاثرہ تمام لوگوں سے درخواست کی ہے کہ وہ پہلی فرصت میں اس کمیٹی کا فارم پُر کرکے ممبر بنیں۔ ممبرشپ کے لئے معمولی فیس رکھی گئی ہے۔ انہوں نے ریاست کرناٹک سمیت ملک و بیرون ملک بالخصوص گلف میں مقیم ہزاروں متاثرین سے درخواست کی ہے کہ وہ اس کمیٹی کی ممبرشپ حاصل کرکے قانونی طور پر مضبوطی کے ساتھ منظم انداز میں اپنی لڑائی لڑیں۔ مزید تفصیلات کے لئے جناب سفیر آصف صاحب سے موبائل نمبر : 9844578102 پر رابطہ کرسکتے ہیں۔