ایکزٹ پولس پر اعتبار نہیں، 23مئی کا انتظارہے:ایم بی پاٹل
بنگلورو، 21مئی (ایس او نیوز) ریاستی وزیر داخلہ ایم بی پاٹل نے لوک سبھا انتخابات کے متعلق منظر عام پر آئے ایکزٹ پول کو غیر معتبر قرار دیا۔ اخبار ی نمائندوں سے بات چیت کرتے ہوئے انہوں نے کہاکہ جہاں تک ان کا اندازہ ہے اس میں کوئی دورائے نہیں کہ این ڈی اے تمام پارٹیوں کے مقابل بڑا اتحاد بن کر ابھرے گا لیکن اکثریت سے بہت دور ہوگا۔ اسے 200تا225سیٹیں مل سکتی ہیں۔ انہوں نے کہاکہ ایکزٹ پول اگر سچ ثابت ہوئے تو ملک کی تمام سیاسی پارٹیوں کو عوام کے فرمان کے آگے جھکنا پڑے گا۔کرناٹک میں بی جے پی کو 18تا21سیٹیں ملنے کی پیشین گوئی کو بھی زیادتی قرار دیتے ہوئے انہوں نے کہاکہ ایسا لگتا ہے کہ ایکزٹ پول بنیادی حقائق سے بہت اوپر اٹھ کر ترتیب دیا گیا ہے۔اس کے کئی پہلو ایسے ہیں جن کا ایکزٹ پول کرنے والی ایجنسیاں جواز پیش نہیں کرپائیں۔انہوں نے کہاکہ جو سات ایکزٹ پولس آئے ہیں ان میں سے چار میں منڈیا حلقے سے نکھل کمار سوامی کو کامیاب قرار دیا گیا ہے جبکہ تین سمالتا کی جیت کی پیشین گوئی کی گئی ہے۔ اب ان میں سے کس کو معتبر مانا جائے، انہوں نے کہاکہ ایکزٹ پولس کے غیر معتبر ڈیٹا نے لوگوں کے ذہنوں کو منتشر کردیا ہے، اسی لئے بہتر ہے کہ ان پر اعتبار کرنے کی بجائے 23 مئی کا انتظار کیا جائے۔