گوہاٹی ایئرپورٹ پر نماز کیلئے جگہ کے مطالبہ پر ہائی کورٹ ناراض، کہا؛”نماز پڑھنی ہے تو مسجد جاؤ“
گوہاٹی ،30/ ستمبر(ایس او نیوز/ایجنسی)گوہاٹی ایئرپورٹ پر نماز پڑھنے کے لیے الگ سے ایک کمرہ بنانے کا مطالبہ کرنے والی عرضی کو ہائی کورٹ نے یہ کہہ کرخارج کر دیا کہ آپ کو عبادت کرنی ہے تو اپنی عبادتگاہ چلے جائیں اور وہاں جاکر عبادت کریں۔ ساتھ ہی گوہاٹی ہائی کورٹ نے اس مفاد عامہ عرضی پر سخت اعتراض بھی ظاہر کیا -
میڈیا رپورٹوں کے مطابق چیف جسٹس سندیپ مہتا اور جسٹس سشمتا کھاند نے عرضی دہندہ سے کہا کہ اگر نماز کے لیے الگ سے کمرہ نہیں بنے گا تو کیا سماج کا کچھ نقصان ہوگا؟ اتنا ہی نہیں، ججوں نے اس عرضی پر یہ بھی سوال اٹھا دیا کہ آخر اس میں مفاد عامہ جیسا کیا ہے؟چیف جسٹس نے اس عرضی پر سماعت کے دوران کہا کہ اس معاملے میں بنیادی حق کا کیا معاملہ ہے؟ ہمارا ملک سیکولر ہے- پھر کسی ایک طبقہ کے لیے علیحدہ عبادت خانہ کا انتظام کیسے ہو سکتا ہے؟ اگر اس طرح کا کوئی کمرہ نہ بنایا جائے تو عوام کا کیا نقصان ہے؟ ہم ایک ہی طبقہ کے درمیان نہیں رہتے ہیں - اگر کسی کی خواہش عبادت کرنے کی ہے تو وہ مقرر جگہ (مسجد)پر جا سکتا ہے-
''عرضی دہندہ نے اپنی بات رکھتے ہوئے کہا کہ کچھ فلائٹس کی ٹائمنگ ایسی ہے جب مسلمانوں کے لیے نماز کا وقت ہوتا ہے- اس پر چیف جسٹس نے کہا کہ ''ایسا ہے تو پھر آپ کو اپنی سہولت کے مطابق فلائٹ لینی چاہیے- آپ نماز پڑھنے کے بعد کی ہی فلائٹ لیں - آپ کو ایئرپورٹ پر سہولت بھی ہے- ہم آپ کی بات سے مطمئن نہیں ہیں - آخر کسی ایک ہی طبقہ کے لیے اس طرح کی سہولت کا مطالبہ کیسے کیا جا سکتا ہے؟'' اس پر عرضی دہندہ نے کہا کہ دہلی، ترووننت پورم اور اگرتلہ ہوائی اڈوں پر نماز کے لیے الگ سے جگہ ہے، لیکن گوہاٹی میں ایسا نہیں ہے- جواب میں بنچ نے کہا کہ اگر ایسا نہیں ہے تو کیا یہ بنیادی حقوق کی خلاف ورزی ہے؟ کیا یہ کسی شہری کا حق ہے کہ وہ نماز کے لیے الگ سے کمرے کا مطالبہ کرے- اگر ایسے مطالبات ایئرپورٹ پر کیے جائیں گے تو پھر کل دیگر عوامی مقامات پر بھی اس طرح کے مطالبے کیے جا سکتے ہیں - آپ کے پاس نماز اور پوجا وغیرہ کے لیے جگہ ہے- آپ وہاں جائیں اور اپنی عبادت کریں -