بھٹکل: شمالی کینرا میں طوفانی بارش کا سلسلہ جاری۔کئی دیہات تالاب میں تبدیل، ندی کنارے بسنے والوں کے لئے چوکنا رہنے کی ہدایت
بھٹکل 22ستمبر (ایس او نیوز) ضلع شمالی کینرا کے تقریباً تمام تعلقہ جات میں موسلا دھار بارش اور تیز ہواؤں کا سلسلہ جاری ہے جس کے نتیجے میں کئی دیہاتوں میں زرعی زمین ، ناریل کے باغات اور راستے وغیرہ تالاب میں تبدیل ہوگئے ہیں، مسلسل ہورہی بارش کی وجہ سے عام زندگی بھی ٹھپ ہوگئی ہے جبکہ ندیوں کے کنارے بسنے والوں کے لئے خطرات اور خدشات بڑھ گئے ہیں۔
کاروار میں کالی ندی پر تعمیر کیے گئے سوپا ڈیم میں پانی کی سطح بہت زیادہ بڑھ جانے کے بعد کرناٹکا پاور کارپوریشن لمیٹڈ کی طرف سے ندی کنارے نشیبی علاقے میں بسنے والوں کو درپیش خطرات کے مد نظر چوکنا رہنے کی ہدایت جاری کردی گئی ہے۔کیونکہ بارش اسی طرح جاری رہنے پر ڈیم کے اندرموجود پانی خطرے کےنشان کو پار کرنے کی صورت میں اضافی پانی فوری طور پر ندی میں چھوڑنے کے امکانات پیدا ہوگئے ہیں۔
کل تک کی صورتحال کے مطابق سوپا ڈیم میں پانی خطرے کے نشان چھونے کے لئے آٹھ میٹر کا فاصلہ باقی رہ گیا تھا۔ خیال رہے کہ امسال مانسون میں کرناٹکا پاور کارپوریشن لمیٹیڈ کی طرف سے پہلی مرتبہ عوام کے لئے چوکنا رہنے کی وارننگ جاری کی گئی ہے۔
ہوناور کی گُنڈا بال ندی میں بھی پانی کی سطح بڑھ جانے سے ندی کنارے رہنے والے کئی خاندانوں کو محفوظ مقامات پر منتقل کیا گیا ہے۔ جبکہ اُڈپی، مینگلور اور گوا سے مچھلیوں کے شکار کے لئے نکلی ماہی گیری بوٹوں کوبھاری بارش کے چلتے سمندر میں اُٹھنے والی اونچی لہروں کی وجہ سے کاروار بندرگاہ میں لنگر انداز کیا گیا ہے، بارش کی وجہ سے انکولہ میں بعض مکانات کونقصان پہنچنے کی بھی اطلاعات ملی ہیں۔
بھٹکل، ہوناور، کمٹہ، انکولہ اور کاروار کے ساتھ ساتھ سرسی، سداپور، یلاپور ، جوئیڈا اور منڈگوڈ میں بھی بھاری بارش کے ساتھ ساتھ کچھ وقتوں کے لئے رُک رُک کر بھی بارش ہونے کی خبریں ہیں۔