بھٹکل 18/مئی (ایس او نیوز)  تعلقہ میں گذشتہ تین راتوں میں مسلسل بجلیوں کی خطرناک چمک اور بادلوں کی گرجدار آوازوں کے ساتھ  بارش  ہورہی ہے، مگر جمعہ کی اولین ساعتوں میں ہوئی تیز ہواوں کے ساتھ بارش کے نتیجے میں ایک مکان پر درخت گرنے سے تین لوگوں کے زخمی ہونے کی اطلاع ملی ہے۔

بتایا گیا ہے کہ بھٹکل تعلقہ کے جالی  پٹن پنچایت حدود میں ایک مکان پر ناریل کا درخت گرنے سے نہ صرف گھر کی چھت کو نقصان پہنچا، بلکہ گھر کے اندر سورہے تین لوگ بھی زخمی ہوگئے ، جنہیں بھٹکل سرکاری اسپتال سے مرہم پٹی کرائی گئی ہے۔

جالی میں رات کو اچانک مادیوی گوئیدا نائک کے مکان پر درخت گرنے سے  گھروالوں کو کچھ سمجھنے کا موقع نہ مل سکا اور پل بھر میں  چھت کے کھپریل گھر کے اندر سونے والوں پر گرگئے، جس سے تین لوگوں کو چوٹیں آئی ہیں۔ درخت گرنے سے چھت کو کافی نقصان پہنچا ہے۔

خبر ملی ہے کہ ہیبلے پنچایت حدود کے  ناگما جٹپا نائک کے مکان پر بھی درخت گرنے سے گھر کی چھت کو کافی نقصان پہنچا ہے۔ محکمہ روینو کے آفسران نے دونوں گھروں کا جائزہ لے کر نقصانات کا تخمینہ لگا رہے ہیں۔

رات کو بادلوں کی خطرناک آوازوں کے ساتھ بجلیاں ایسی گرتی ہیں جیسے اسمان ٹوٹ پڑنے والا ہو، البتہ بارش کے ساتھ ہی رات کے اوقات میں گرمی کا زور ٹوٹ رہا ہے، مگر دن کا اُجالا پھیلتے ہی شہر میں پھر گرمی شروع ہوجاتی ہے، اور رمضان کے ماہ میں شدت کی گرمی سے روزہ داروں کا کچھ  زیادہ ہی برا حال ہورہا ہے۔