بینگلورو 6 / جنوری (ایس او نیوز) کرناٹکا ہائی کورٹ نے ریاستی حکومت کو ہدایت دیتے ہوئے کہا ہے کہ سرکاری بسوں میں خواتین کے مفت سفر کے لئے جو 'شکتی اسکیم' جاری کی گئی ہے اسے پرائیویٹ بسوں کے لئے بھی لاگو کیا جائے ۔
خیال رہے کہ کارکلا کے ایک پرائیویٹ بس آپریٹر شرتھ کمار شیٹی نے ہائی کورٹ سے اپیل کی تھی کہ خواتین کے لئے مفت سفر کی شکتی اسکیم کو پرائیویٹ بسوں میں بھی لاگو کرنے کی ہدایت دی جائے کیونکہ سرکاری بسوں میں اس اسکیم کے لاگو ہونے کے بعد پرائیویٹ بسوں میں مسافروں کی کمی کی وجہ سے انہیں بڑا گھاٹا ہو رہا ہے ۔ اس لئے حکومت کی اسکیم کو پرائیویٹ بسوں میں لاگو کرتے ہوئے خواتین کے مفت سفر کا کرایہ حکومت کی طرف سے انہیں ادا کیا جائے جیسا کہ سرکاری بسوں میں کیا جا رہا ہے ۔
حالانکہ یہ اپیل جولائی 2023 میں داخل کی گئی تھی ۔ اب ہائی کورٹ کی طرف سے حکومت کی ہدایت دی گئی ہے کہ اس اپیل پر قانون کے مطابق اس اسکیم کو پرائیویٹ بسوں میں بھی لاگو کرنے پر دو مہینے کے اندرغور کرے ۔
ایک اندازے کے مطابق پرائیویٹ بسوں کے کاروبار سے تقریباً 75 ہزار ملازمین کا روزگار جڑا ہے اور حکومت کو پرائیویٹ بسوں کے ٹیکس کی صورت میں 1620 کروڑ روپے کی آمدنی ہوتی ہے ۔