ہوناور میں گیس سے بھری ٹینکر اور مسافر بردار ٹمپو کے درمیان خطرناک ٹکر؛ پانچ ہلاک؛ کئی زخمی؛ کئی ایک کی حالت نازک
ہوناور 15/ستمبر (ایس او نیوز) ہوناور تعلقہ کے کرکی نیشنل ہائی وے 66 پر ہوئے ایک بدترین سڑک حادثہ میں پانچ مسافر ہلاک ہوگئے جس میں ایک ماں اور بچی بھی شامل ہیں۔ حادثے میں پندرہ سے زائد مسافر زخمی بھی ہوئے ہیں جس میں بعض کی حالت انتہائی نازک بتائی گئی ہے جس سے مرنے والوں کی تعداد بڑھنے کا خدشہ بھی ظاہر کیا گیا ہے۔
حادثہ سنیچر شام قریب چھ بجے اُس وقت پیش آیا جب کمٹہ سے ہوناور کی طرف جانے والی مسافر بردار ٹمپو مخالف سمت سے آرہی گیس سے بھری ٹینکر سے تیز رفتاری کے ساتھ ٹکراگئی۔ ٹکر میں ٹمپو ڈرائیور سمیت ماں اور بیٹی کی موقع پر ہی موت واقع ہوگئی، جبکہ دیگر دو لوگوں نے ہوناور اسپتال پہنچنے کے بعد دم توڑ دیا۔ حادثے میں بعض کی حالت انتہائی نازک بتائی گئی ہے، جنہیں فوری طور پر منی پال روانہ کیا گیا ہے۔
مرنے والوں کی شناخت ٹمپو ڈرائیور کمٹہ بگّون کے رہنے والے کملاکر بھنڈاری (50)، ہوناور کرکی کے رہنے والے موہن میستا (50)، کمٹہ ناگور کی سیمنت مڈیوال (34)، ان کی چھ سالہ بیٹی سنچنا مڈیوال اور ہوناور شہر کے ناگراج نائک (26) کی حیثیت سے کی گئی ہے۔
ہوناور پولس نے بتایا کہ شدید طور پر زخمی ہونے والوں میں آٹھ کو اُڈپی اور منی پال اسپتال روانہ کیا گیا ہے، دیگر زخمیوں کو ہوناور سرکاری اسپتال سمیت دیگر نجی اسپتالوں میں بھی داخل کیا گیا ہے۔
یہ تو اچھا ہوا کہ گیس سے بھری ٹینکر سے ٹکرانے کے بعد ٹینکر کو کچھ نقصان نہیں پہنچا ورنہ گیس رسنے کی صورت میں حادثہ نہایت خطرناک ہوسکتا تھا۔ ٹکر سے ٹمپو کے پرخچے اُڑ گئے ہیں، ٹمپو کے ایک طرف کا حصہ مکمل طور پر ٹوٹ پھوٹ چکا ہے ، جبکہ اوپر کا پورا ٹاپ ہی غائب ہے، ٹمپو کے نیچے سے کافی مقدار میں خون بہتا ہوا دیکھا گیا۔
حادثہ کی اطلاع ملتے ہی ہوناور پولس جائے وقوع پر پہنچی اورمقامی لوگوں کی مدد سے زخمیوں کو سرکاری اسپتال پہنچایا، جبکہ بعد میں نعشوں کو بھی پوسٹ مارٹم کے لئے اسپتال پہنچانے کے بعد دونوں سواریوں کو بھی ہٹاتے ہوئے نیشنل ہائی وے کو سواریوں کے لئے صاف کیا۔
ہوناور پولس تھانہ میں معاملہ درج کیا گیاہے اور پولس مزید چھان بین کررہی ہے۔
