بھٹکل 27/مئی (ایس او نیوز) ضلع اُترکنڑا میں آج بدھ کو مزید چھ کورونا پوزیٹو معاملات سامنے آنے کے ساتھ ہی ضلع میں کورونامتاثرین کی تعداد بڑھ کر 73 ہوگئی ہے۔ ضلع میں انکولہ، ہلیال اور سداپور ایسے تعلقہ جات تھے جہاں اب تک کورونا نے دستک نہیں دی تھی، مگر آج سداپور کے ایک شخص میں بھی کورونا کے اثرات پائے گئے ہیں۔
ذرائع سے ملی اطلاع کے مطابق سداپور کے ایک 52 سالہ شخص کی رپورٹ پوزیٹو آئی ہے، اسی طرح ہوناور کے ایک 24 سالہ نوجوان کی بھی رپورٹ پوزیٹو آئی ہے، یلاپور سے موصولہ اطلاع کے مطابق یہاں آج چار لوگوں کی رپورٹ پوزیٹو آئی ہے جس میں تین بچے اور ایک 26 سالہ نوجوان ہے۔ بتایا گیا ہے کہ ایک چار سال کا بچہ ، ایک نو سال کا بچہ اور ایک 12سالہ لڑکی کی رپورٹ پوزیٹو آئی ہے۔
ذرائع سے ملی اطلاع کے مطابق یہ سبھی لوگ ایک ہفتہ قبل ہی مہاراشڑا سے ضلع میں داخل ہوئے تھے اور ضلع میں داخل ہوتے ہی انہیں الگ تھلگ کرکے رکھا گیا تھا اور ان کے تھوک کے سیمپل جانچ کے لئے روانہ کئے گئے تھے جس میں سے چھ کی رپورٹ کورونا پوزیٹو آنے کی ہیلتھ بلٹین کے ذریعے تصدیق ہوئی ہے۔
خیال رہے کہ آج کے تازہ معاملات کے ساتھ ہی ضلع شمالی کینرا میں کورونامتاثرین کی تعداد بڑھ کر 73 ہوگئی ہے جس میں سے اب تک 35 لوگ صحت یاب ہوکر اسپتال سے ڈسچارج ہوچکے ہیں، اس حساب سے اب ضلع میں ایکٹو کیسس 38 ہیں۔
یاد رہے کہ ضلع شمالی کینرا کے جملہ 12 تعلقہ جات میں سے اب تک دس تعلقوں تک کورونا پہنچ چکا ہے۔