بھٹکل میں پہلا روزہ مکمل؛ شام ہوتے ہی روزہ کھولنے کی تیاری میں نظر آئے عوام؛ تراویح کے لئے ہر مسجد میں تین سے چار حفاظ
بھٹکل 6/مئی (ایس او نیوز) آج پیر کو بھٹکل سمیت اطراف کے علاقوں میں پہلا روزہ مکمل ہوگیا۔ عصرکی نماز کے فوری بعد بھٹکل چوک بازار سمیت شہر کے اہم ناکوں پر مسلمان روزہ افطاری کا سامان خریدتے ہوئے نظر آئے۔رمضان میں بھٹکل کے مسلمانوں کی مرغوب غذا سموسہ سمیت مختلف انواع کے بجے ہر طرف دستیاب نظر آئے۔اس کے علاوہ لوگ چنا بٹانا، انڈہ وڑا، پنجابی سموسہ اور دیگر کئی ناشتے بھی خریدتے ہوئے پائے گئے۔
شہر میں آج صبح سے آسمان پر بادل چھائے رہے ،شدت کی گرمی سے لگ رہا تھا کہ ہلکی بارش ہوگی، مگر درجہ حرارت 30 سے 34 ڈگری تک پہنچنے کے باوجود پانی کا ایک بوند نہیں گرا۔
تراویح میں نمازیوں سے مساجد فُل: رمضان کی شروعات ہوتے ہی بھٹکل کی مساجد نمازیوں سے بھرگئی ہے، بالخصوص تراویح کے لئے مسلمانوں کی کثیر تعداد مسجدوں میں نظر آرہی ہے، ہر مسجد میں تین سے چار حفاظ کرام تراویح کے لئے متعین ہیں، بتایا گیا ہے کہ بعض مساجد میں چار سے بھی زائد حفاظ کرام ہیں جن کی خوش کُن اور مسحور کن آواز شہر کی تمام مساجد میں گونجتی سنائی دی۔ شہر میں شدت کی گرمی کو دیکھتے ہوئے اب اکثر مساجد میں ائرکنڈیشن کا انتظام ہے جس کے چلتے مسلمان سکون کے ساتھ نماز اور تراویح ادا کرتے ہوئے نظر آئے۔
