بھٹکل 25/ڈسمبر (ایس او نیوز) نیشنل ہائی وے پر دو بیل ایک دوسرے پر حملہ کرتے ہوئے اچانک ایک اسکوٹر سے ٹکرانے کے نتیجے میں اسکوٹر سوار شدید زخمی ہوگیا جسے بھٹکل ویلفیر اسپتال کے بعد مینگلور اسپتال میں داخل کیا گیا ہے۔ حادثہ ویسے جمعہ کو پیش آیا تھا، مگر کافی تاخیر سے ساحل آن لائن کو حادثے کی اطلاع ملی۔
زخمی ہونے والے شخص سید عبدالقادر (46) نے بتایا کہ وہ جمعہ کی نماز کے لئے دوپہر قریب پاونے ایک بجے مدینہ کالونی سے نور مسجد جانے کے لئے نکلے تھے کہ شفا کراس کے قریب نیشنل ہائی وے پر اچانک دو بیل ایک دوسرے پر حملہ کرتے کرتے اُس کی اسکوٹر سے ٹکراگئے۔ ٹکر لگتے ہی وہ روڈ پر گرگئے اور ان کا ایک ہاتھ اور ایک پیر بری طرح فریکچر ہوگیا۔ان کے ایک کندھے کو بھی شدید چوٹ لگی، جس کے نتیجے میں انہیں پہلے ویلفئیر اسپتال لے جایا گیا، وہاں سے کنداپور پھر اُسی شب مینگلور پرائیویٹ اسپتال میں داخل کیا گیا، جہاں آج ان کے ہاتھ اور پیر کا آپریشن بھی ہوا ہے۔
بھٹکل مدینہ کالونی کے رہائشی سید عبدالقادر نے بتایا کہ لوگ جانوروں کو آوارہ گردی کے لئے راستوں پر چھوڑ دیتے ہیں، جس سے سواریوں کو سخت پریشانی کا سامنا کرنا پڑتا ہے، تعجب اس بات پر ہے کہ انتظامیہ اس تعلق سے کوئی کاروائی نہیں کرتی۔ انہوں نے سوال کیا کہ جانوروں کی زد میں آکر انہیں اب اتنی بڑی پریشانی اُٹھانی پڑی ہے، اب وہ شکایت کریں بھی تو کس کے خلاف کریں ؟ سید عبدالقادر نے بھٹکل کے ذمہ داران سے درخواست کی ہے کہ وہ اس طرف توجہ دیں اور جانوروں کو سڑکوں پر چھوڑنے کے خلاف کاروائی کریں۔ انہوں نے عوام الناس سے اپنی صحت یابی کے لئے خصوصی دعائوں کی بھی درخواست کی ہے۔