مودی حکومت کے خلاف پورے ملک کے کسانوں کا 'دہلی مارچ' 26 نومبر کو
سرسہ،28؍اکتوبر(ایس او نیوز؍ایجنسی) مرکزی حکومت کی طرف سے حال ہی میں بنائے گئے تین زرعی قوانین کے خلاف پورے ملک کے کسان آئندہ 26 اور 27 نومبر کو دہلی کوچ کریں گے۔ کسان اس سے پہلے پانچ نومبر کو پورے ملک میں مختلف راستوں میں رخنہ ڈال کر اپنے غصہ کا اظہار کریں گے۔ مذکورہ فیصلے کی معلومات آج دہلی کے گردوارہ رقاب گنج میں پورے ملک کی مختلف کسان تنظیموں کی کوآرڈی نیشن کمیٹی کی ہوئی میٹنگ میں شرکت کرکے واپس آئے ہریانہ کسان منچ کے ریاستی صدر پرہلاد سنگھ بھارو کھیڑا نے دی۔ اس میٹنگ میں یوگیندر یادو، ایم وی سنگھ بلویر سنگھ، گرنام سنگھ پرگٹ سنگھ، مندیپ سنگھ ناتھوان، پرہلا د سنگھ بھروکھیڑا سمیت کئی کسان لیڈروں نے شرکت کی۔
بھروکھیڑا نے کہاکہ مرکزی حکومت کسانوں کی تحریک کو ہلکے میں لے رہی ہے جبکہ پورے ملک کے مختلف کونوں میں چل رہی تحریک سے دوررس نتائج حاصل ہوں گے۔ پڑوسی صوبہ پنجاب میں قومی اور اسٹیٹ ہائی وے پر لگے ٹول ناکوں کوآزاد کرنے کے بعد اب کل سے ہریانہ میں ڈبوالی کو ٹول ناکہ آزاد کرانے کی مہم شروع کی جائے گی۔ 28اکتوبر کو ڈبوالی دہلی روٹ پر گاوں ساونت کھیڑا کے نزدیک بنے ٹل ناکہ پر کسان اپنا غیرمعینہ مدت کا دھرنا شروع کریں گے۔