ہلیال میں شکر کارخانے کے خلاف کسانوں کا احتجاجی دھرنا
ہلیال،17؍اکتوبر (ایس او نیوز) شکر کے کارخانے کی طرف سے گنا کسانوں کی بقایا رقم ادا نہ کرنے اور موجودہ فصل کے لئے اچھی قیمت طے کرنے کے مسئلے پر گنا کسانوں نے احتجاجی مظاہرا کیا اور سڑک پر ٹریفک روکتے ہوئے دھرنے پر بیٹھ گئے۔
اس موقع پر بی جے پی لیڈر اور سابق ایم ایل اے سنیل ہیگڈے نے مظاہرین کے ساتھ اپنی یکجہتی دکھائی اور خود بھی دھرنے میں شامل ہوگئے۔ انہوں نے اس موقع پر خطاب کرتے ہوئے کہا کہ میں ہمیشہ کسانوں کے مفادات کے لئے ان کے ساتھ ہوں۔ ان کے مطالبات پورے کرنے کے لئے ضلع انچارج وزیر شیورام ہیبار کے علم کسانوں کے تمام مسائل لائے گئے ہیں۔ اس سلسلے میں وزیراعلیٰ کی توجہ ان مسائل کی طرف مبذول کروائی گئی ہے ۔ اس لئے جلد ہی کسانوں کے مسائل حل ہونے کی توقع ہے۔
انہوں نے مزید کہا کہ گزشتہ سال رکن پارلیمان اننت کمار ہیگڈے نے بھی شکر کارخانے کے اعلیٰ افسران کے ساتھ میٹنگ منعقد کرکے کسانوں کو درپیش تمام مسائل حل کرنے کی بات کہی تھی۔ اور کسانوں پر درج مقدمات واپس لینے اور ان کے لئے ایک اسپتال بھی قائم کرنے کی مانگ بھی رکھی تھی۔
اس موقع پر بی جے پی ہلیال تعلقہ یونٹ کے عہدیدراران اور کارکنا ن موجود تھے اور ان سب سے کسانوں کے احتجاج کے لئے اپنی حمایت کا اظہار کیا۔