کئی ممالک سے آنے والی پروازوں کے مسافروں کا متحدہ عرب امارات میں داخلہ بند
دبئی، 21؍جون (ایس او نیوز؍ایجنسی)متحدہ عرب امارات نے لائبیریا ، سیرالیون اور نیمبیا سے آنے والی قومی اورغیرملکی پروازوں پر سوار مسافروں کے سوموار سے ملک میں داخلے پر پابندی عائد کردی ہے جبکہ دبئی نے جنوبی افریقہ ، نائیجیریا اور ہندوستان سے تعلق رکھنے والے مسافروں کوآئندہ بدھ سے امارت میں آنے کی اجازت دے دی ہے۔ یواے ای کی سرکاری خبررساں ایجنسی وام نے ہفتے کے روز اطلاع دی ہے کہ لائبیریا ، سیرالیون اور نیمبیا سے آنے والی پروازوں پر پابندی کا اطلاق راہداری مسافروں پر بھی ہوگا۔
البتہ یواے ای کے راستہ سے ان ممالک کو جانے والی پروازیں اس پابندی سے مستثنیٰ ہوں گی۔دریں اثناء دبئی نے کووِڈ-19 کی پابندیوں کی وجہ سے بیرون ملک پھنس جانے والے یواے ای کے اقامتی ویزے کے حامل افراد کو امارت میں واپس آنے کی اجازت دے دی ہے،لیکن اس کی یہ شرط عائد کی ہے کہ انھوں نے یواے ای کی منظورشدہ کسی ایک ویکسین کی دونوں خوراکیں لگوا رکھی ہوں۔
دبئی کی سپریم کمیٹی برائے کرائسیس اور ڈیزاسسٹر مینجمنٹ نے ایک اعلامیے میں کہا ہے کہ جنوبی افریقہ ، نائیجیریا اور بھارت سے تعلق رکھنے والے مسافروں کو بدھ 23 جون سے ملک میں آنے کی اجازت ہوگی۔بھارت سے تعلق رکھنے والے مسافروں پر ایک اضافہ شرط عائد کی گئی ہے۔ان کے پاس کارآمد اقامتی ویزا ہونا چاہیے،وہ یو اے ای کی منظورشدہ کسی ایک ویکسین کی دونوں خوراکیں لگوا چکے ہوں اور انھیں سفر پر روانہ ہونے سے 48 گھنٹے قبل کرائے گئے پی سی آر ٹیسٹ کی منفی رپورٹ پیش کرنا ہوگی۔
یواے ای کے شہری اس پابندی سے مستثنیٰ ہوں گے۔ اعلامیے کے مطابق بیرون ملک سے مسافروں کی دبئی میں آمد کے بعد صرف کیو آر کوڈ والا منفی پی سی آر ٹیسٹ کاسرٹی فیکیٹ ہی قبول کیا جائے گا۔
