انکولہ میں ڈاکٹر انجلی نے بی جے پی پر کیا طنز : مجھے بیرون ضلع کی کہنے والوں کو میرے حلقے میں آنا ہی ہوگا
انکولہ، 28 / مارچ (ایس او نیوز) انکولہ کے ناڈ ور ہال میں منعقدہ انتخابی تیاریوں کے جائزاتی اجلاس سے خطاب کرتے ہوئے اتر کنڑا حلقے کی امیدوار ڈاکٹر انجلی نمبالکر نے بی جے پی کو آڑے ہاتھوں لیتے ہوئے کہا مجھے اتر کنڑا ضلع سے باہر کی امیدوار بتانے والی بے جے پی کو بھی میرے حلقے میں آنا ہی ہوگا ۔ انہیں شائد پتہ نہیں ہے کہ خانہ پور بلاک کہاں پر ہے ، کیونکہ وہاں وہ لوگ کم ہی آتے ہیں ۔
ڈاکٹر انجلی نے کہا کہ دھرم اور ذات پات کی سیاست کے ذریعے بی جے پی والوں نے ضلع کا نام جو خراب کیا ہے اسے درست کرنے کا ہمیں اس بار موقع ملا ہے ۔ سیاست میرے لئے کوئی نہیں چیز نہیں ہے ۔ خانہ پور کے جنگلاتی علاقے میں صرف خواتین کے لئے ایک خصوصی اسپتال قائم کرنے کا سپنا پورا کیا ہے ۔ اب ضلع کے عوام نے سوپر اسپیشالٹی اسپتال کا خواب دیکھا ہے اسے پورا کرنے کی کوشش کریں گے ۔
ضلع انچارج وزیر منکال وئیدیا نے کہا کہ کاروار انسٹی ٹیوٹ آف میڈیکل سائنسس کو درجہ بڑھایا جا رہا ہے ۔ ہماری پارٹی نے ایک ڈاکٹر کو ہی پارلیمنٹ کے لئے اس حلقے کا امیدوار بنایا ہے ۔
اس موقع پر رکن اسمبلی ستیش سئیل ، کے پی سی سی رکن رمانند نائیک، ستیش نائک، ضلع کانگریس صدر سائی گاونکر وغیرہ نے بھی اپنے خیالات کا اظہار کیا ۔ کانگریسی لیڈروں اور کارکنان کی ایک بڑی تعداد اجلاس میں شریک تھی ۔