مڈکیری:20؍نومبر(ایس اؤ نیوز) موجودہ دور میں انسان جن مشکلات اور پریشان کن حالات سے دوچار ہے اگر ان سے نجات پانا چاہتا ہےتو لازمی ہے کہ وہ مذہب کی طرف رخ کرے اور غیبی قوت پر ایمان لائے۔ منگلورو شانتی پرکاشن کےمینجر اور جماعت اسلامی ہند کرناٹک کے سکریٹری ایم ایچ محمد کوئیں نے ان خیالات کااظہار کیا۔
وہ یہاں کارنیا ہال میں جماعت اسلامی ہند کرناٹک کی مقامی شاخ کی جانب سے سیرت النبی ﷺ مہم کی مناسبت سےمنعقدہ’’ محمد ﷺانسانیت کےرہنما ‘‘ مذاکرے میں خطاب کررہےتھے۔ انہوں نے عوام سے گفتگو کرتےہوئےکہاکہ کرونا کے بعدوالے دنوں میں کئی حقائق ہمارےسامنے ظاہرہوئےہیں جنہیں قبول کرنےکے سوا ہمارےپاس کوئی چارہ نہیں ہے۔ انہوں نےکہاکہ مذاہب انسان کوزندگی گزارنےکےحدود سکھاتےہیں، عزت نفس کا شعور پیدا کرتےہیں، مذہبی فکر انسانی زند گی کی رہنمائی کرتی ہے، اللہ کے پیغمبر و ں نے انسانو ں کو یہی پیغام دیاہےکہ وہ اپنے خالق کی طرف پلٹیں۔ رسولوں کی پوری زندگی اسی بات کی دعوت دیتی ہے۔
جرنلسٹ اوشا پریتم نے مہمان خصوصی کی حیثیت سےبات کرتےہوئے کہاکہ جہاں تک ہم مذاہب کا مطالعہ کرتے ہیں ان میں کوئی خامی نہیں ہے، لیکن جب مذہب کے پیروکار مذہب کا غلط مفہوم نکالتے ہیں یا سمجھتے ہیں مسائل پیدا ہوتے ہیں۔ پیغمبر حضرت محمد ﷺ نے مذہب کا صحیح مفہوم پیش کرتےہوئے ایک صحت مند معاشرے کی تعمیر کی تھی ، دیگر مذہبی رہنماؤ ں نے بھی اسی طرح کاپیغام عوام کو دیا تھا۔ ہائی اسکول ٹیچرس اسوسی ایشن کے ضلعی صدر محبوب نے بھی اپنے خیالات کااظہارکیا۔ ناظم علاقہ یو عبدالسلام وغیرہ ڈائس پر موجود تھے۔