کاروار،16؍دسمبر (ایس او نیوز) ڈائریکٹر جنرل اور  انسپکٹرجنرل آف پولیس پروین سود نے ضلع شمالی کینرا ایس پی کے دفتر کا دورہ کرنے کے بعد اخباری نمائندوں سے بات چیت کرتے ہوئے کہا کہ جس طرح بنگلورو کے نیلمنگلا میں اپنی ویزا کی مدت سےریاست میں زیادہ قیام کرنے غیر ملکیوں کے لئے حراستی کیمپ قائم کیا گیا ہے بالکل اسی طرز پرآئندہ دنوں میں  شمالی کینر ا میں بھی    ڈٹینشن سینٹر  قائم کیا جائےگا۔

انہوں نے کہا کہ ویزا کی مدت ختم ہونے کے بعد ریاست مقیم غیر ملکیوں پر نگاہ رکھی جارہی ہے۔ان کے متعلقہ  سفارت خانوں   سے رابطہ قائم کرتےہوئے ایسے لوگوں کو حراست میں لیا جارہا ہے اور انہیں واپس بھیجنے کی کارروائی کی جارہی ہے۔

ضلع میں سڑک حادثات میں ہورہی اموات کے تعلق سے آئی جی پی  نے کہا کہ ضلع پولیس کے ساتھ اس معاملے میں بات چیت سے پتہ چلا ہے کہ ہر سال تقریباً200 افراد ان حادثات میں اپنی جان سے ہاتھ دھو بیٹھتے ہیں۔اس لئے جن سڑکوں پر خطرناک موڑ ہیں ان کی نشاندہی ’بلیک اسپاٹ‘کے طور پر کی گئی ہے اور اس کی تفصیلات پی ڈبلیو ڈی کو دے دی گئی ہے تاکہ حادثات کے تدارک کے لئے اقدامات کیے جاسکیں۔

انہوں نے مزید بتایا کہ فی الحال ڈسٹرکٹ پولیس کے لئے 219مکانات فراہم کیے گئے ہیں جبکہ  ایس پی  نے  500مکانات کی مانگ رکھی ہے۔ اس تجویز کو ’پولیس گرہا 2025  ‘ منصوبے میں شامل کیا جائے گااور جو آئندہ سال لاگو ہونے والا ہے۔ اس  کے علاوہ  انہوں نے یہ بھی بتایا کہ اپریل 2021 سوِل کانسٹیبل کے بھرتی کی جائے گی  اور  6مہینے کے بعد ریزرو پولیس کے لئے بھی بھرتی کی جائے گی۔