دیش پانڈے سمیت تین سینئر ارکان اسمبلی کو کابینی درجہ کے ساتھ اہم عہدے تفویض
بنگلورو،30/دسمبر (ایس او نیوز/ایجنسی) وزیر اعلیٰ سدارامیا نے جمعہ کو کانگریس کے تین سینئر ارکان اسمبلی آر وی دیشپانڈے، بی آر پاٹل اور بسواراج رائی ریڈی کو کابینی درجہ کے ساتھ اہم عہدہ تفویض کئے ہیں۔
بی آر پاٹل اور بسوراج رائے ریڈی جو ماضی میں حکومت کے کام کاج کے بارے میں تنقید کرتے رہے ہیں، کابینہ کی درجہ بندی کے ساتھ بالترتیب مشیر برائے وزیر اعلیٰ اور اقتصادی مشیر مقرر کیا ہے۔
کہا جاتا ہے کہ اس کا مقصد حکمراں جماعت کے اندر موجود عدم اطمینان کو ختم کرنا ہے۔
انہوں نے ایک اور تجربہ کار کانگر یس رکن اسمبلی آر وی دیشپانڈے کو بھی کابینہ کی درجہ بندی کے ساتھ انتظامی اصلاحات کمیشن کا چیئر پرسن مقررکیا۔
بی آر پاٹل الند حلقہ کی نمائندگی کرتے ہیں جبکہ رائے ریڈی اور دیشپانڈے (دونوں سابق وزراء) بالترتیب یلبرگہ اور ہلیال طبقات کی نمائندگی کرتے ہیں۔ تینوں تقرریاں فوری اثر سے کی گئی۔
کانگریس کے ذرائع کے مطابق ان تقرریوں کے ساتھ سدارامیا نے یقیناً ارکان اسمبلی کو مطمئن کرنے کی کوشش کی ہے اور یہ تینوں ارکان اسمبلی اپنے طویل اور وسیع تجربے سے وز یر اعلیٰ کے لئے پیدا ہونے والے مسائل اور حالات کو سنبھالنے میں کار آمد ثابت ہوں گے۔
تینوں سینئر قانون ساز وزارت کے خواہشمند تھے اور کہا جاتا ہے کہ وہ کابینہ سے باہر ہونے سے پریشان ہیں۔
پاٹل اور رائے ریڈی حکومت اور بعض وزراء کے کام کاج پر کھل کر تنقید کرتے رہے ہیں اور انہوں نے ناراضگی کا اظہار کرتے ہوئے وزیر اعلیٰ سے شکایت بھی کی تھی۔ یہ تقرریاں اس وقت ہوئی ہیں جب کانگریس پارٹی قانون سازوں اور کارکنوں کو مختلف ریاستی بورڈز اور کارپوریشنوں میں کلیدی عہدوں پر تعینات کرنے کی تیاری کررہی ہیں۔