پرانی ڈانڈیلی میں سڑک مرمت کا مطالبہ - عوام نے کیا احتجاجی مظاہرہ
ڈانڈیلی 10 / جنوری (ایس او نیوز) پرانی ڈانڈیلی میں پینے کا پانی سپلائی کرنے کے مقصد سے پائپ بچھانے کے لئے سڑک کھدائی سے پریشان مقامی لوگوں نے سڑک کی فوری مرمت کا مطالبہ کرتے ہوئے پٹیل سرکل پر راستہ روکو احتجاجی مظاہرہ کیا ۔
مظاہرین کا کہنا تھا کہ گزشتہ چار پانچ سال سے پانی کی پائپ لائن کے لئے کھدائی کرنے کے بعد سڑک کو ناقابل استعمال حالت میں چھوڑ دیا گیا ہے ۔ اب مزید یو جی ڈی کا کام شروع ہونے کے بعد اس سڑک کی حالت بری طرح خراب ہوگئی ہے ۔ اس سڑک پر موٹر گاڑیاں چلانا ممکن نہیں رہا ہے ۔ پیدل چلنا جوکھم کا کام بن گیا ہے ۔ اب تک سیکڑوں دو پہیہ سوار حادثوں کا شکار ہو چکے ہیں ۔ لیکن پانی کی پائپ لائن اور یو جی ڈی پائپ لائن کے انجینئروں کو عوام کی تکلیف کا ذرا بھی احساس نہیں ہے ۔ اس سڑک کی مرمت کی طرف توجہ نہیں دی جا رہی ہے ۔ صرف زبانی وعدے کیے جا رہے ہیں اور وقت گزاری کا رویہ اپنایا جا رہا ہے ۔ اس لئے سڑک کی پوری طرح مرمت ہونے تک پر امن احتجاج چلتا رہے گا ۔
پی ڈبلیو ڈی کے انجینئر سدھاکر کٹی منے موقع پر پہنچ کر احتجاجی مظاہرین سے بات چیت کرتے ہوئے یقین دلایا کہ آئندہ ایک مہینے کے اندر سڑک کی مرمت کا کام انجام دیا جائے گا ۔ اس یقین دہانی کے بعد احتجاج ختم کیا گیا ۔