کاروار:24؍جون(ایس اؤ نیوز) وزیر دفاع راج ناتھ سنگھ نے  جمعرات کو  کاروار پہنچ کرسی برڈ پروجکٹ کے تحت چلنے والے   ایشاء کے سب سےبڑے  بحری اڈے کا معائنہ کیا اور یہاں پر ہورہے کاموں پر  اطمینان کا اظہار کیا۔

ارگا کے آئی این ایس کدمبا بحری  اڈے پر اترتے ہوئے  وزیر دفاع راج ناتھ سنگھ  نے بحری  اڈے کی ترقی کےلئے کئے  جارہے کاموں کا جائزہ لیا اور  بحری  اڈے کے دوسرےمرحلے میں ہورہے مختلف تعمیراتی  کاموں کا معائنہ کرنےکے بعد افسران سے ضروری  جانکاری  حاصل کی۔  اس موقع پر بحری فوج کے اڈمرل کرم بیر سنگھ نے وزیر دفاع کو  پروجکٹ کے تعلق سے مکمل جانکاری دی ۔

پروجکٹ کے  کنٹریکٹرس اور انجینرس سے گفتگو کرتے ہوئے  راجناتھ سنگھ نے کہا کہ  کاروار کا یہ بحری اڈہ  مسلح افواج کی  آپریشنل تیاری  کو مزید تقویت بخشے گا   اور تجارت ، معیشت اور انسانی   امدادی کاروائیوں  کو بڑھانے میں کارگر ثابت ہوگا۔ سی برڈ پروجکٹ جو  11,169 ایکڑ زمین پر تعمیر ہورہا ہے،  اس کے پہلے مرحلے میں گہرا سمندری بندرگاہ  ، بریک واٹرس ، ڈریجنگ ، ٹاون شپ ، ایک بحری اسپتال ، ایک ڈاکیارڈ ، اپلفٹ سینٹر اور  شپ لفٹ  شامل ہے۔ جبکہ دوسرے مرحلے میں  ایک ہوائی پٹی ، ایک ایئر اسٹیشن اور ناول ریسرچ سینٹر  شامل ہیں۔

چیف آف دی نیول اسٹاف ایڈمرل کرمبیر سنگھ کے ہمراہ ، وزیر دفاع نے آئی این ایس کدمبا کے ہیلی پیڈ پر  پہنچنے سے پہلے اس منصوبے کے علاقے اور مقامات کا فضائی سروے کیا۔

ہندوستانی بحریہ کی جانب سے ایک بیان میں کہا گیا ہے کہ سنگھ نے کاروار میں جاری کاموں کا معائنہ کیا اور جہاز لفٹ ٹاور میں صلاحیت کے مظاہرے سمیت سائٹ پر بریفنگ حاصل کی۔ وزیر دفاع کا  کاروار دورہ،   دو۔ روزہ سفر نامہ کا ایک حصہ ہے اور اس کا اختتام کوچی  (کیرالہ) میں ہوگا ، جہاں انہیں ہندوستان کے پہلے دیسی ساختہ طیارہ بردار بحری  جہاز وکرانت  کے بارے میں بریفنگ دی جائے گی۔