بھٹکل 19 اکتوبر (ایس او نیوز) بھٹکل تعلقہ کے مضافاتی علاقہ بیلکے میں دن دھاڑے چوری کی واردات کے بعد مقامی لوگوں نے دو لوگوں کو پکڑ کر پولس کے حوالے کردیا ہے۔ پتہ چلا ہے کہ چوری کی واردات میں مزید تین لوگ فرار ہوگئے ہیں۔
بتایا گیا ہے کہ بیلکے کے فوریسٹ چیک پوسٹ کے قریب واقع تمیا نائک کے مکان پر پیر کی دوپہر کو چوری کی واردات اُس وقت پیش آئی جب اہل خانہ کسی فیسٹول میں شریک ہونے کے لئے گئے تھے اور گھر پر تالہ لگا ہوا تھا۔ چوروں نے اس بات کا فائدہ اُٹھاتے ہوئے تالہ توڑ کر گھر کے اندر داخل ہوئے اور گھر میں موجود قریب چھ ہزار روپیہ نقد، کاجو بیچ سے بھرا تھیلہ اور دیگر گھر کی چیزوں سمیت بعض اہم کاغذات لے کر فرار ہوگئے۔
پتہ چلا ہے کہ چوری کی واردات انجام دینے کے بعد غلطی سے چوروں نے اپنا ایک موبائل گھر کے اندر ہی چھوڑ دیا تھا، جیسے ہی گھر کے افراد واپس آئے تو چوری کا معاملہ سامنے آیا۔ معلوم ہوا ہے کہ ایک موبائل غلطی سے گھر کے اندر رہ گیا تھا، جسے لینے کے لئے چور واپس گھر آئے تھے جس کے دوران دو لوگ عوام کے ہاتھ لگ گئے جن کی اچھی طرح خاطرداری کرتے ہوئے عوام نے پولس کے حوالے کیا ہے۔ مزید تین لوگ فرار ہونے میں کامیاب ہوگئے ہیں۔
بھٹکل مضافاتی پولس کے اہلکاروں نے جائے وقوع پر پہنچ کر جائزہ لیا ہے اور ضروری معلومات حاصل کرتے ہوئے معاملہ درج کرلیا ہے۔ چھان بین جاری ہے۔