ڈانڈیلی: اسکِل ڈیولپمنٹ کو اہمیت دینے پر ہی روزگار کو فروغ ملے گا ۔ نائب وزیر اعلیٰ اشوتھ نارائن
ڈانڈیلی,16؍ستمبر (ایس او نیوز) ڈانڈیلی میں واقع وشویشوریا ٹیکنیکل یونیورسٹی کی نیشنل اسکِل ڈیولپمنٹ اکیڈیمی کے ہاسٹل اور بورڈنگ عمارت کا آن لائن افتتاح کرتے ہوئے نائب وزیر ڈاکٹر سی این اشوتھ نارائن نے کہا کہ دیہی علاقوں کے طالب علموں کو کالج کی تعلیم مکمل کرنے کے بعدخودروزگار ی کے مواقع فراہم کرنے کے لئے اسکِل ڈیولپمنٹ اکیڈیمی میں خصوصی کورسس کا اہتمام کیا گیا ہے۔
انہوں نے کہا کہ اس سے قبل ضلع شمالی کینرا کے طلبہ کو ہنرمندی کے کوسس سیکھنے کے لئے ہبلی، دھارواڑ، بیلگاوی اور بنگلوروجانا پڑتا تھا۔اب ایسے طلبہ کی سہولت کے لئےرکن اسمبلی آر وی دیشپانڈے نے ڈانڈیلی میں ہی وی ٹی یو کی نیشنل اکیڈیمی قائم کردی ہے۔عوام کو چاہیے کہ اس کا بھر پور فائدہ اٹھائیں۔کیونکہ ہنرمندی کو اہمیت دینے سے ہی روزگار کو فروغ ملے گا۔
اس موقع پر خطاب کرتے ہوئے رکن اسمبلی آر وی دیشپانڈے نے کہا تعلیم کے مختلف میدان ہیں۔اس میں اسکل ڈیولپمنٹ یاہنر مندی کو فروغ دینا زیادہ فائدہ مندہوتا ہے۔ اس سے روزگار کے ذرائع قائم کرنے میں مدد ملتی ہے۔اعلیٰ پیمانے کا روزگارملنا ہے تو پھر بہترین تعلیم اور ہنر مندی سے آراستہ ہونا چاہیے۔
وشویشوریا ٹیکنیکل یونیورسٹی کے چانسلر پروفیسر کری سدّپّا نے کہا کہ نوجوان نسل کے لئے تعلیم مکمل کرنے کے بعد روزگار کے لئے دوسرے مقامات کی طرف ہجرت کرنے کے بجائے خودروزگاری کے تعلق سے اہمیت اور فوقیت دی جائے گی تو دیہی علاقوں کے طلبہ کی زندگیاں سنور جائیں گی۔ اس لئے ڈانڈیلی میں وی ٹی یونیورسٹی کی کی نیشنل اسکل ڈیولپمنٹ اکاڈیمی قائم کی گئی ہے۔ طالب علموں کو اس سےبھر پور فائدہ استفادہ کرناچاہیے۔