بھٹکل،23؍مئی (ایس او نیوز) کاروار میڈیکل کالج اسپتال (کمس) کے کووِ ڈ وارڈ میں زیرعلاج بھٹکل کے 20افراد کو صحت یابی کے بعد آج سنیچر کو اسپتال سے چھٹی دے دی گئی ہے۔
خیال رہے کہ منگلورو کے فرسٹ نیورو اسپتال میں علاج کے لئے جانے والے ایک جوڑے سے بھٹکل میں کووِڈ کا دوسرا حملہ شروع ہواتھا اور8سے 12مئی تک کل29 افراد میں کووڈ پوزیٹیو ہونے کی بات سامنے آئی تھی۔ ان سب کو علاج کے لئے کاروار میڈیکل کالج اسپتال کے خصوصی وارڈ میں علاج کے لئے داخل کیاگیا تھا۔
آج اسپتال سے جن لوگوں کو ڈسچارج کیا گیا ہے، اُن میں ایک حاملہ خاتون سمیت جملہ نو خواتین ، آٹھ مرد حضرات اور تین بچے ( ایک، دو اور تین سال) شامل ہیں اسی طرح آج ریلیز کئے جانے والوں میں ایک 83 سال کی عمر کا معمر شخص بھی شامل ہے۔
یاد رہے کہ اس سے پہلے دبئی سے کورونا کا مرض لاحق ہونے والے اور ان سے رابطے کی وجہ سے متاثرہونے والے 11 افراد پہلے ہی مکمل صحت یاب ہوچکے ہیں۔ اب کی بار اسپتال سے ڈسچارج ہونے والے 20فراد کے ساتھ اب کووِڈ سے صحت یاب ہونے والوں کی تعداد31 ہوگئی ہے۔ اس طرح اب ضلع اُترکنڑا میں کورونا کے ایکٹیو معاملات 33 رہ گئے ہیں۔
ڈپٹی کمشنرکی جانب سے اسپتال میں انجام دی گئی الوداعی تقریب : اسپتال سے رخصت پانے والے بھٹکل کے 20 کورونا سے متاثرہ لوگوں کے لئے اُترکنڑا کے ڈپٹی کمشنر ڈاکٹر ہریش کمار کی جانب سے ایک الوداعی تقریب کااہتمام کیا گیا جس میں ضلع ایس پی شیوپرکاش دیوراج اور ضلع پنچایت کے چیف ایکزی کوٹیو آفسر محمد روشن سمیت دیگر سرکاری اہلکار موجود تھے۔
بتایا گیا ہے کہ تمام 20 لوگوں کو تین ایمبولنس پر سوار کرکے بھٹکل کے لئے روانہ کیا گیا ہے، بھٹکل میں انہیں پہلے سرکاری اسپتال لایا جائے گا اور دیگر کاغذی کاروائیوں کے بعد انہیں گھر میں ہی کورنٹائن کرنے کے احکامات دئے جائیں گے۔ یاد رہے کہ اس سے قبل اسپتال سے ڈسچارج کئے جانے کے بعد بھٹکل کے تمام گیارہ صحت یاب لوگوں کو 14 دنوں کے لئے بھٹکل کے ایک پرائیویٹ ہوٹل میں کورنٹائن کیا گیا تھا۔ مگر اب تازہ گائیڈلائن کے مطابق سیدھے گھروں میں ہی کورنٹائن کرنے کی ہدایت جاری کی گئی ہے۔