ریاض،19؍جولائی(ایس او نیوز؍ایجنسی) سعودی عرب نے گذشتہ 24 گھنٹے میں کرونا وائرس کے 2504 نئے کیسوں کی تصدیق کی ہے اور اب مملکت میں کرونا وائرس کے کل کیسوں کی تعداد 250920 ہوگئی ہے۔

وزارت صحت کے مطابق ان نئے کیسوں میں 178 کی دارالحکومت الریاض میں تشخیص ہوئی ہے۔ جدہ میں 177 اور الہفوف میں 163 نئے کیس ریکارڈ کیے گئے ہیں۔باقی کیس مملکت کے دوسرے شہروں اور صوبوں میں ریکارڈ کیے گئے ہیں۔

گذشتہ 24 گھنٹے میں پہلے سے کرونا وائرس کا شکار 39 مریض وفات پاگئے ہیں اور اب وفات پانے والے مریضوں کی تعداد 2486 ہوگئی ہے۔

سعودی عرب میں کرونا وائرس کے صحت یاب ہونے والے مریضوں کی شرح 80 فی صد ہے اور 19 جولائی تک 197735 مریض صحت یاب ہوچکے ہیں۔

وزارت صحت کے ترجمان ڈاکٹر محمد العبدالعالی نے اتوار کے روز کہا ہے کہ حکومت کی شعبہ صحت کے لیے لامحدود معاونت اور امداد کی بدولت سعودی عرب اپنے تمام خطوں اور علاقوں میں تحفظ صحت کو یقینی بنا سکا ہے اور تمام ضرورت مندوں کا علاج کیا جاسکا ہے۔

واضح رہے کہ جون میں ہانگ کانگ میں قائم گروپ ڈیپ نالج نے ڈیٹا کے جامع تجزیے کے بعد سعودی عرب کو کرونا وائرس کی وَبا کے خلاف جنگ کے دوران میں دنیا کے محفوظ ترین بیس ممالک میں شمار کیا تھا اور وہ سترھویں نمبر پر تھا اور وہ کووِڈ-19 کے مریضوں کی صحت و سلامتی کے معاملے میں پہلے زمرے کے ممالک میں شامل تھا۔

سعودی عرب نے گذشتہ ہفتے کرونا وائرس کے نئے تشخیص شدہ کیسوں کی تعداد میں استحکام کے پیش نظر اس وبا کے خطرے کی سطح کم کردی تھی۔سعودی عرب میں گذشتہ دو ہفتے کے دوران میں کرونا وائرس کے یومیہ کیسوں کی تعداد میں واضح کمی ریکارڈ کی گئی ہے اور اس طرح اس وائرس کے خطرے کی سطح میں کمی واقع ہوئی ہے۔

اس کی نشان دہی عالمی ماہرین پر مشتمل ٹیموں کے وضع کردہ نقشے سے ہوئی ہے۔ ہارورڈ یونیورسٹی کے گلوبل ہیلتھ انسٹی ٹیوٹ اور ایڈمنڈ جے سفرا مرکز برائے اخلاقیات کی ٹیموں نے دنیامیں کرونا وائرس کے پھیلنے کے رجحانات کی نشان دہی کے لیے یہ نقشہ وضع کیا تھا۔

تحقیقی ماہرین کے فراہم کردہ ڈیٹا کے مطابق جولائی کے اوائل میں سعودی عرب میں کرونا وائرس کے پھیلنے کی سطح نارنجی تھی۔یہ دوسری اعلیٰ ترین سطح ہے۔اس کا یہ مطلب ہے کہ ملک میں وائرس تیزی سے پھیل رہا ہے۔

تاہم 13 جولائی کو سعودی عرب میں کرونا وائرس کے پھیلنے کی سطح زرد (ییلو) کردی گئی تھی۔یہ نارنجی سے ایک درجہ کم ہے اور دوسرا کم ترین درجہ ہے۔