کورونا کے شبہ میں بھٹکل اسپتال میں داخل ایک نوجوان فرار
بھٹکل 29/مارچ (ایس او نیوز) کورونا کے شبہ میں بھٹکل سرکاری اسپتال میں داخل ایک نوجوان فرار ہوگیا ہے جس کو لے کر بھٹکل پولس سمیت انتظامیہ کا سر چکرانے لگا ہے۔
بھٹکل جیسے چھوٹے سے شہر میں سات لوگوں کے کورونا سے متاثر ہونے کی اطلاع سے ایک طرف یہاں کے عوام میں تشویش پائی جارہی ہے وہیں یہاں کے انتظامیہ کی راتوں کی نیندیں اُڑ چکی ہیں، مگر اب اس نئی واردات سے سمجھا جارہا ہے کہ اُن کے طوطے بھی اُڑ گئے ہوں گے۔
ذرائع سے ملی اطلاع کے مطابق اس نوجوان کو جمعہ صبح اسپتال میں داخل کیا گیا تھا، بتایا جارہا ہے کہ ایک لڑکی چہرے پر ماسک ڈال کر اس سے اسپتال میں ملنے کے لئے آتی تھی اور کھانا وغیرہ دینے کے نام پر وارڈ کے اندر جانے کی اجازت حاصل کرتی تھی۔ جس کو دیکھتے ہوئے شک کا اظہار کیا جارہا ہے کہ وہی لڑکی اس نوجوان کو اپنے ساتھ لے کر فرار ہوگئی ہے۔ نوجوان کی تلاش کا کام جاری ہے۔