بھٹکل میں موسلا دھار برسات کا سلسلہ جاری ۔ سڑکوں پر کیچڑ اور پانی سے بعض علاقوں میں چلنا پھرنا دوبھر
بھٹکل 15/ جون (ایس او نیوز) بھٹکل تعلقہ میں گزشتہ دو تین دنوں سے مسلسل اور زوردار بارش ہورہی ہے، جس کی وجہ سے نشیبی علاقوں میں پانی جمع ہونے لگا ہے تو بعض علاقوں سڑکیں ٹوٹ پھوٹ گئی ہیں اور کیچڑ اورپانی جمع ہوگیا ہے ، جس کی وجہ سے لوگوں کے لئے چلنا پھرنا دوبھر ہوگیا ہے۔
موسلا دھار برسات کی وجہ سے تالاب اور ندیاں پانی سے بھرنے لگی ہیں۔ بھٹکل شہر اور مضافات کے پانی سپلائی کے کام آنے والی کڈوین کٹہ ندی اور ڈیم میں پانی وافر مقدار میں جمع ہوگیا ہے۔ تعلقہ کے مختلف مقامات پر سڑکوں پر برسات کا پانی تیزی سے بہنے کی وجہ سے جگہ جگہ سے سڑک کے حصے بہہ گئے ہیں اور گڈھے پڑ گئے ہیں۔ جبکہ بھٹکل شہری علاقے میں گٹر اور نالوں کی صفائی کا کام تیزی سے ہورہا ہے۔ بعض سڑکوں پر گڈھے پڑنے کی وجہ سے پیدل چلنے والوں کے علاوہ موٹر گاڑیوں کے لئے بھی مشکلات پیش آرہی ہیں۔
کووڈ لاک ڈاون میں مزید چھوٹ دئے جانے کے بعد ضروری چیزیں خریدنے کے لئے بڑی تعداد میں لوگ بازار کا رخ کررہے ہیں، لیکن تیز ہوا کے ساتھ تھوڑی تھوڑی دیر میں تیز ہونے والی بارش سے خریداری کرنا اور بارش کے پانی سے بچ کر گھر پہنچنا ان لوگوں کے لئے مشکل ہوگیا ہے۔ دوسری طرف مسلسل برسات سے کسان خوش ہوگئے ہیں اور کھیتی باڑی کی ابتدائی سرگرمیاں تیز ہوگئی ہیں۔