بھٹکل، 6؍ستمبر (ایس او نیوز) حضرت ڈاکٹر علی ملپا صاحب ؒ کی وفات کی اطلاع ملتے ہی ریاست کے مختلف شہروں سے کئی ایک ذمہ داران نے بھٹکل پہنچ کر ان کے گھروالوں کے ساتھ تعزیت کی، اُن میں بنگلور سے تشریف فرما آل انڈیا مسلم پرسنل لاء بورڈ کے رکن تاسیس مولانا شاہ قادری سید مصطفیٰ رفاعی جیلانی ندوی بھی شامل ہیں، جنہوں نے گذشتہ روز بھٹکل جامعہ مسجد میں  مرکزی جماعتوں کی طرف سے منعقدہ تعزیتی اجلاس میں شرکت کرتے ہوئے مرحوم کے ساتھ اپنے والہانہ تعلقات کا حوالہ دیتے ہوئے بتایا کہ حضرت ڈاکٹر علی ملپا صاحب ؒ  کا انتقال  نہ صرف اہل نوائط و اہل بھٹکل کیلئے ایک بڑا حادثہ ہے بلکہ ریاست و ملک کیلئے بھی ایک عظیم سانحہ ہے اسلئے کہ حضرت موصوف ؒ ایک اللہ والی ہستی تھے جو ملّت و ملک کی صلاح و فلاح کے لئے سب و روز دعا گو تھے، ایسی صوفی صافی ، مخلص و خیرخواہ برزگ شخصیت کا انتقال کرنا ، بلاشہ سب کے لئے رنج و الم اور غم کا باعث ہے۔

مولانا شاہ قادری سید مصطفیٰ رفاعی ندوی نے اپنے بیان میں کہا کہ حضرت موصوفؒ جامعہ اسلامیہ بھٹکل کے بانیوں میں تھے، یہ جامعہ ریاست کرناٹک کا ایک مرکزی دینی مدرسہ ہے، جس سے ہزاروں طلباء (حفاظ، علماء اور فضلاء ) فارغ ہو کر ملک میں اور بیرون ملک میں دینی خدمات انجام دے رہے ہیں۔ یہ جامعہ، حضرت موصوفؒ کے لئے صدقہ جاریہ ہے۔ 

مزید کہا کہ اس ادنیٰ رفاعی فقیر کا حضرت موصوف ؒ سے تقریباً چالیس سال سے زیادہ عرصہ سے ربط و تعلق رہا ہے۔ ہرملاقات پر بہت شفقت فرماتے اور دعاؤں سے خوب خوب نوازتے تھے۔انہوں نے مغفرت کی دعا کرتے ہوئے فرمایا کہ  اللہ تعالیٰ آپکی مغفرت فرمائے اور آپکی تعلیمی تربیتی ، اصلاحی تمام خدمات کو قبول فرمائے آمین۔