بھٹکل تینگن گُنڈی بندرگاہ میں بغیر اجازت بھگوا جھنڈا لہرانے پر اننت کمار ہیگڑے سمیت ٢١ کے خلاف درج ہوا معاملہ
بھٹکل 6 / مارچ (ایس او نیوز) تعلقہ کے ہیبلے گرام پنچایت علاقے میں تینگن گنڈی ساحل کے قریب رکن پارلیمان اننت کمار ہیگڑے نے کسی بھی قسم کی اجازت حاصل کیے بغیر جو بھگوا جھنڈا لہرایا تھا اس کے خلاف پولیس نے کیس درج کر لیا ہے ۔
بھٹکل دیہی پولیس اسٹیشن میں رکن پارلیمان اننت کمار ہیگڑے کے علاوہ ان کے دیگر 20 سے زائد ساتھیوں کے خلاف بھی کیس درج ہوا ہے جس میں بی جے پی لیڈر گووند نائک، سبرایا دیواڈیگا، شریکانت نائک، دیپک نائک، سریش کونے منے، روی نائک جالی وغیرہ کے نام شامل ہیں ۔ گزشتہ ڈیڑھ مہینے کے اندر رکن پارلیمان اننت کمار ہیگڑے کے خلاف درج ہونے والا یہ تیسرا کیس ہے ۔
ضلع پولیس سپرنٹنڈنٹ وشنو وردھن نے بتایا :"اجازت حاصل کیے بغیر عوامی جگہ پر کٹّا تعمیر کرنے، نام کا بورڈ لگانے اور جھنڈا لہرانے کے خلاف گرام پنچایت پی ڈی او کی طرف سے دی گئی شکایت کی بنیاد پر کیس درج کیا گیا ہے ۔" انہوں نے بتایا کہ :" عوامی مقام پر قانون کی خلاف ورزی کرتے ہوئے جھنڈا لہرانے، فساد پر اکسانے کے ساتھ مذہبی جذبات کو ٹھیس پہنچانے کی کوشش کی وجہ سے آئی پی سی کی دفعہ 143, 147, 149, اور 153a کے تحت کیس داخل کیا گیا ہے ۔