بیندور20/مئی (ایس او نیوز) دوگھرانوں کے افراد کے بیچ معمولی تکرار کے بعدکرمنجیشور نامی مقام پر چھ افراد پر مشتمل ایک ٹولی نے گھر میں گھس کر جان لیوا حملہ کیا جس میں ڈنڈے اور تلواروں کا استعمال کیا گیا اور ا س کے نتیجے میں دو خواتین سمیت پانچ افراد زخمی ہوگئے۔

    بتایاجاتا ہے کہ اس حملے میں کونے گدّے ہاؤس کی رہنے والی شاردا(32سال) سنگین طور پر زخمی ہوئی ہے اور اسے علاج کے لئے منی پال کے کے ایم سی اسپتال میں داخل کیاگیا ہے۔ دیگر زخمیوں کے نام سوشیلا (52سال)، گنیش(45سال)،اوشا(52سال)اور شاردا(55سال) بتائے جاتے ہیں۔ان زخمیوں کو کوٹیشور کے اسپتال میں داخل کیاگیا ہے۔

    واردات کا پس منظر یہ بتایا جاتا ہے کہ کوٹیشور میں منعقدہ ایک تہوار میں کونے گدّے ہاؤس کے رہنے والے ان لوگوں نے شرکت کی تھی۔ اس موقع پر شام کے وقت ناننا منے میں پارکنگ کے مسئلے پر شوبھا نامی خاتون اور اس کے گھر والوں سے ان کا جھگڑا ہوگیا تھا۔اس واقعے کے بارے میں کونے گدّے والوں نے پولیس میں شکایت درج کروائی تھی اور پولیس نے صبح میں اس تعلق سے تحقیقات کرنے کا وعدہ کیاتھا۔ پھر کونے گدّے والا خاندان اپنے گھر واپس لوٹ آیا اور جب وہ لوگ رات کا کھانا کھا رہے تھے تو اچانک شوبھا، اس کے بھائی ستیش، دامودر، رتناکراور شیورام کے علاوہ اس کے شوہرنوین چندرا نے شاردا کے گھر میں گھس کر ان پرہلاکت خیز حملہ کردیا۔

    اس واردات کی اطلاع ملنے پر پولیس نے موقع پر پہنچ کر معائنہ کیااوراس حملے میں ملوث افراد کو جلد ہی گرفتار کرنے کا وعدہ کیا ہے۔ جبکہ دوسری طرف دیواڈیگا کمیونٹی کے تنظیموں نے اس حملے کی سخت مذمت کی ہے اور ملزمین کو جلد گرفتار کرکے سخت قانونی کارروائی کرنے کا مطالبہ کرتے ہوئے کہا ہے کہ اگر اس معاملے میں پولیس کی طرف سے کوتاہی کی گئی تو وہ لوگ متحدہ طور پر احتجاجی مظاہرے کریں گے۔