بھٹکل:11؍نومبر(ایس اؤ نیوز) ماہ ِ ربیع الاول  کی مناسبت سے  سرورکائنات حضرت محمد مصطفیٰ ﷺ کی سیرت کو عام برادران ِ وطن تک پہنچانے کے لئے جماعت اسلامی ہند بھٹکل کی جانب سے منائی جارہی سیرت مہم کے پہلے دن بروز پیر 11نومبر کی صبح قلب شہر شمس الدین سرکل پر عام لوگوں کے درمیان سرورِ عالم حضرت محمد مصطفیٰ ﷺکی بزبان کنڑا تصنیف کردہ ’’پروادی محمد ؐ یلّرِیگاگی (پیغمبر حضرت محمد ؐ سب کے لئے )‘‘ نامی تصنیف کا برادران وطن کے ساتھ اجراء کیاگیا ۔

بھٹکل کنڑا ساہتیہ پریشد کے صدر گنگادھر نائک نے سیرت کتاب کا اجراء کرنے کے بعد خطاب کرتے ہوئے کہاکہ حضرت محمد ؐ نے اپنی آفاقی صداقت سے پُر تعلیمات اور پیغام کے ذریعے سبھی انسانوں کے لئے نیکی اور بھلائی  کا راستہ بتایا ہے۔ انسانوں کی زندگی میں مذاہب دیوار نہیں بننا چاہئے   بلکہ مذاہب ہمارے باطن کا احتساب کرنے والا آئینہ ہونا چاہئے ، اسی طرح انہوں نے  مذاہب کے ذریعے  دوسروں کے ذہنوں کو سمجھنے کی کوشش کرنے کی طرف بھی دھیان دلایا۔

جنتا ودیالیا پی یو کالج  شرالی کے پرنسپال اے بی رام رتھ نے اس موقع پر خطاب کرتے ہوئے کہاکہ انسانوں کے درمیان دیواریں کھڑی کرنا صحیح نہیں ہے، انسانیت ایک ہی کنبہ ہے  کے مصداق ہم سب مل جل کر زندگی گزاریں تو خوشی ملتی ہے۔ مذہب کی  ٹھیکدار ی کا دور اب ختم ہوگیا ہے، حضرت محمد ؐ کی تعلیمات بھی اسی کو بیان کرتی ہیں ۔ انہوں نے مذہب کے غلط استعمال پر افسوس کا اظہار کیا۔ سماجی کارکن ستیش نائک نے کہاکہ ہم سب کو مذہبی سائے میں ہی زندگی گزارنی چاہئے اور جہاں سے بھی بھلائی کی باتیں ملتی ہیں ان کو قبول کرناچاہئے۔ جماعت اسلامی ہند بھٹکل کے معاون امیر مقامی مجاہد مصطفیٰ نے صدارت کی۔

تقریب کا آغاز عزیزی غطریف رضامانوی کی تلاوت قرآن سے ہوا۔ جماعت اسلامی ہند بھٹکل شعبہ دعوت کے ناظم محمد رضا مانوی نے استقبال کرتے ہوئے افتتاحی کلمات پیش کئے ۔ تقریب میں ناظم ضلع محمد طلحہ سدی باپا، شعبہ اسلامی معاشرہ کے ناظم مولانا سید زبیر ایس ایم، قادر میراں پٹیل، عبدالقادر باشا رکن الدین، پروفیسر سید ہاشم زرزری، محمد یونس رکن الدین ، قمر الدین مشائخ، ایس آئی اؤ بھٹکل کے صدر ثناء اللہ اسدی ، عبدالجبار اسدی، ڈاکٹر نسیم خان اور شعبہ خواتین کی ناظمہ ساجدہ انجم مانوی ، ضلعی ناظمہ نبیرہ محتشم سمیت کئی مرد و خواتین موجود رہتے ہوئے راہ چلتے  عوام اور طلبا کے درمیان بزبان کنڑا سیرت کتابچے اور مٹھائیاں  تقسیم کیں۔