بھٹکل :6؍ جنوری (ایس اؤ نیوز ) انجمن گرلس ہائی اسکول بستی روڈ بھٹکل کے سالانہ جلسہ میں ہر سال دئیے جانےو الے ’بتول انجمن ‘ سال 2023-24کاگولڈ میڈل جماعت دہم کی ہونہار طالبہ صفا بنت عبدالمجید فرید اور سال 2022-23کا گولڈ میڈل افراح بنت سید عرفان کو دیا گیا۔
4/جنوری 2024بروز جمعرات کو ہائی اسکول کے صحن میں منعقدہ سالانہ جلسے میں طالبات کو بتول انجمن سے اعزاز بخشا گیا۔ جب کہ سال 2023-24کی رنر اپ سلور میڈل عروہ بنت عبدالقیوم اکرمی اور افراح انجم بنت ابراہیم شیخ اور سال 2022-23کی رنر اپ خیر النساء انجم بنت محمد سراج الدین شیخ اور قرۃ بنت ننھے صاحب کو سلور میڈل سے نوازاگیا۔
سالانہ جلسےمیں محترمہ فرقانہ افروز باطن نے مہمان خصوصی کے طورپر طالبات سے خطاب کرتےہوئے عورتوں کی تعلیمی اہمیت پر روشنی ڈالی۔ اور ہر ایک طالبہ کو ام المومنین حضرت خدیجہ ؓ سے رہنمائی حاصل کرتےہوئے زندگی کو روشن بنانے کی صلاح دی۔ مہمان خصوصی نے طالبات کی زندگی میں کامیابی کےلئے طالبات کی سخت محنت کے ساتھ ساتھ والدین کےرول کا بھی تذکرہ کیا اور طالبات کو امتحانات کا سامنا کیسے کریں اس تعلق سے بھی چند گُر بتائے۔ انجمن حامئی مسلمین بھٹکل کی زنانہ کمیٹی کی رکن محترمہ سیماابوبکر قاسمجی نے جلسے کی صدارت کرتےہوئے بتول انجمن کی اہمیت بتائی اور انجمن کے سبھی تعلیمی اداروں کی صدور مدرسہ اور پرنسپل انجمن ہی کی الومنی ہونے کی بات کہتےہوئے کہاکہ انجمن کی تعلیمی خدمات کا یہ منہ بولتا ثبوت ہے۔
سالانہ جلسے کا آغاز عروہ اکرمی کی تلاوت قرآن سے ہوا۔ انشراح اور ان کے ساتھیوں نے حمد پیش کی تو منظرہ طیبہ نے نعت،فاطمہ ثانیہ شاہ بندری کی ٹیم نے انجمن کا ترانہ اور ناز فاطمہ اور ساتھیوں نے استقبالیہ نغمہ پیش کیا۔ صدر مدرسہ عطیہ اے جی نے اسکول کے سالانہ رپورٹ کی خواندگی کی۔ محترمہ آسیہ اے جی نے شکریہ کلمات پیش کئے۔ ڈائس پر انجمن پی یوکالج فور ویمن کی پرنسپل محترمہ ڈاکٹر فرزانہ فرح محتشم، نائب پرنسپل محترمہ طالعہ معلم، محترمہ صبا دامدا، محترمہ شہناز جوکاکو، محترمہ کلپنا تلگیری اور محترمہ حسینہ شیخ وغیرہ موجود تھیں۔