بھٹکل:21؍ڈسمبر (ایس او نیوز) تربیت ایجوکیشن سوسائٹی بھٹکل کے زیر سرپرستی چلنے والے شمس انگلش میڈیم ہائی اسکول اور نیو شمس اسکول کا مشترکہ 47واں سالانہ جلسہ ہیبلے گرام پنچایت حدود کے جامعہ روڈ پر واقع سید علی کیمپس میں 22اور23ڈسمبر 2018کو منعقد کئے جانےکی منتظمین نے پریس ریلیز جاری کرتے ہوئے جانکاری دی ہے۔

سالانہ جلسے کی مناسبت سے 22ڈسمبر کی صبح فینسی ڈریس کا مقابلہ ہوگا ۔ 30-10بجے کے ڈائس پروگرام میں مہمان خصوصی کی حیثیت سے  اترکنڑا ضلع ،محکمہ تعلیمات عامہ کے نائب ڈائرکٹر این جی نایک اور اعزازی مہمان کے طورپرسرمایہ دار شموئیل بھلی شرکت کریں گے۔ ادارے کی طرف سے ہرسال دئیے جانے والے ’’نجمِ اخوان ‘‘ گولڈ میڈل بھی اسی پروگرام میں اسکول کے ایک بہترین متعلم کو نوازاجائے گا۔ اجلاس کی صدارت ادارے کے صدر اسماعیل محتشم کریں گے۔ اسی دن رات 8بجے سے طلبا ثقافتی پروگرام پیش کریں گے۔

23ڈسمبر طالبات اورخواتین کے لئے مخصوص رہے گا۔ طالبات کے پروگرام میں رامپور کی محترمہ قانتہ غنی مہمان خصوصی اور محترمہ فرحہ بلال رکن الدین اعزازی مہمان رہیں گے۔ محترمہ صبیحہ کوڑا صدارت کرنے کی جانکاری دی گئی ہے۔

سالانہ جلسے کوادبی محفل سےجوڑتے ہوئے ادارہ ادب اسلامی ہند بھٹکل کے زیر اہتمام 23ڈسمبر کی رات 8بجے سے ادارے کے مخلص کرم فرما اور اسلامی ادب کے نمائندہ شاعرمرحوم سید اشرف برماور کی یاد میں ’’بیاد سید اشرف برماور ‘‘ مشاعرے کا انعقاد ہوگا۔ جس میں بیرونی اور مقامی شعرائے کرام اپنے کلام سے نوازیں گے۔