بھٹکل 8/فروری (ایس او نیوز) ینوپویا  کالج، مینگلور  میں بی بی اے کی طالبہ  شِفاء   مُسکان  بنت محمد ناصر سوکور کو بہار کے چھپرہ میں منعقد ہونے والے   ایک  تہنیتی پروگرام میں  دوران تعلیم لوگوں کو سماجی برائیوں سے  آگاہ کرنے اور سماجی خدمات میں پیش پیش رہنے پرنیشنل پریرنا دُتھ ایوارڈ سے نوازا گیا ہے۔

بتایا گیا ہے کہ بہار کے چھپرہ میں ہر سال ماہ فروری میں   نوجوانوں کی سماجی  ٹیم  فیس آف فیوچر انڈیا کے زیر اہتمام نیشنل یوتھ ایکسچینج پروگرام کا انعقاد کیا جاتا ہے جس میں ملک کی ہر ریاست سے ایک سماجی کارکن کی نشاندہی کی جاتی ہے اور اُنہیں  اُن کی سماجی خدمات کے اعتراف میں نیشنل پریرنا دُتھ ایوارڈ (یعنی    قومی انسپریشن ایوارڈ)  سے نوازا جاتا ہے۔ اسی مناسبت سے اس بار 3/ فروری کو  منعقدہ تہنتی پروگرام میں    30 مختلف ریاستوں کے سماجی کارکنوں کو  نیشنل پریرنا دُتھ ایوارڈ  2023-24  سے نوازا گیا، جس میں  ریاست کرناٹک سے  بھٹکل کی طالبہ شفاء   مُسکان کا انتخاب کیا گیا۔

بہار کے ایک معروف ہندی روزنامہ میں چھپی خبر کے مطابق   جن 30 لوگوں کو اس ایوارڈ سے نوازا گیا ہے ، اُس میں ایک  آئی اے ایس آفسر ریتیش کمار بھی شامل ہے۔

جیسے ہی اُسے فیس آف فیوچر انڈیا کی طرف سے   دعوت نامہ موصول ہوا، وہ  اپنی والدہ   تبسم محمد ناصر کے ساتھ ممبئی سے ہوتے ہوئے بہار کے چھپرہ کے لئے بذریعہ ٹرین روانہ ہوئی۔یہ لوگ 31 جنوری کو چھپرہ پہنچے تھے۔ شفاء  مُسکان کی والدہ تبسم نے بتایا کہ  اس کی بیٹی کی ابتدائی تعلیم آنند آشرم کانوینٹ اسکول سے ہوئی ، جس کے بعد اُس نے مینگلور ینوپویا کالج میں داخلہ لیا۔ اب وہ بی بی اے  ، ایویشن اینڈ لوجیسٹک میں سکینڈ ائیر کی طالبہ ہے۔ شفاء مُسکان کی والدہ  تبسم نے بتایا کہ  ان کی بیٹی کالج میں ہونے والے ہر طرح کے سماجی کاموں میں بڑھ چڑھ کر حصہ لیتی ہے،  بالخصوص کالج کے زیراہتمام ہونے والے بلڈ ڈونیشن کیمپ، میڈیکل کیمپ،   سوچھ بھارت ابھیان،  بیچ کلیننگ، یتیموں اور   بزرگوں کے آشرم پہنچ کر اُن کی خبرگیری کرنا وغیرہ جیسے بہت سارے سرگرمیوں میں   وہ آگے رہتی ہے۔  والدہ نے یہ بھی بتایا کہ  وہ سماجی کاموں کے ساتھ ساتھ  کالج کی پڑھائی  لکھائی میں بھی کافی ذہین ہے ۔  والدہ نے تمام لوگوں سے درخواست کی کہ وہ اس کی بیٹی  کے  لئے  خیر کی دُعا کریں اور نظر بد سے اُسے اللہ تعالیٰ محفوظ  رکھے۔