بھٹکل : تعلقہ اسپتال میں اسٹاف کی کمی - کھل نہیں رہا ہے آئی سی یو یونٹ کا دروازہ
بھٹکل، 18؍جنوری (ایس او نیوز) بھٹکل تعلقہ اسپتال ایک طرف ترقی کی راہ پر چل رہا ہے اور دن بدن یہاں علاج کے لئے آنے والے مریضوں کی تعداد میں اضافہ ہوتا جا رہا ہے مگر نرسنگ اسٹاف کی کمی کی وجہ سے کئی مسائل پیش آ رہے ہیں جس میں وینٹی لیٹر والے آئی سی یو وارڈ میں مریضوں کو داخلہ نہ ملنا بھی شامل ہے ۔
تعلقہ اسپتال میں وینٹی لیٹر سہولت کے ساتھ 10 بستروں والے آئی سی یو وارڈ کا افتتاح ہوئے تقریباً ایک مہینے سے زیادہ کا عرصہ گزر گیا ۔ مگر وہاں پر جس تربیت یافتہ نرسنگ اسٹاف کی ضرورت ہے وہ دستیاب نہ رہنے کی وجہ سے دل کا دورہ ، سانپ کاٹنے یا زہر خورانی کے معاملہ میں حالت بہت زیادہ بگڑنے پر مریضوں کو وینٹی لیٹر سہولت فراہم کرنا ممکن نہیں ہو رہا ہے اور اس وارڈ کا دروازہ مریضوں کے لئے نہیں کھل رہا ہے ۔
اس وقت بھٹکل تعلقہ اسپتال میں 100 بستروں کی سہولت ہے ۔ اس کے لئے 14 ڈاکٹر اور 21 نرسنگ اسٹاف فراہم کیا گیا ہے ۔ نرسنگ اسٹاف میں سے 13 اسامیاں مستقل ہیں جبکہ 8 کو ٹھیکیداری کی بنیاد پر لیا گیا ہے ۔ اس طرح ایک سو بستروں کے اسپتال کے لئے نرسنگ اسٹاف کی یہ تعداد ناکافی ہے ۔ اس بارے میں بات کرتے ہوئے تعلقہ اسپتال کی میڈیکل آفیسر ڈاکٹر سویتا کامت نے کہا : " 100 بستروں والے اسپتال کے لئے کم از کم 30 نرسنگ اسٹاف کی ضرورت ہوتی ہے ، نئے وینٹی لیٹر یونٹ میں کام کرنے کے لئے کم از کم 6 نرسنگ اسٹاف کی ضرورت ہے ۔ اس ضمن میں ڈی ایچ او کو تجویز روانہ کی گئی ہے ۔ اضافی اسٹاف فراہم ہوتے ہی نئے آئی سی یو وارڈ میں مریضوں کا علاج کرنا ممکن ہو جائے گا ۔"
ادھر ڈسٹرکٹ ہیلتھ آفیسر ڈاکٹر شرد نائیک نے بتایا کہ آئی سی یو وارڈ میں خدمت انجام دینے کے لئے تین نرسنگ اسٹاف کو تعینات کیا گیا ہے اور مزید دو اسامیوں کی تعیناتی دو ایک دن میں ہوجائے گی ۔