بھٹکل : میڈیا تعصب کا شکار ہوگیا ہے، اسے سماجی مفادات کے لئے کام کرنا چاہیے - این ایس ایس کے پروگرام میں رضا مانوی کا خطاب
بھٹکل 20 / جنوری (ایس او نیوز) تعلقہ کے ہڈیل سرکاری پرائمری اسکول میں انجمن کالج کے زیراہتمام این ایس ایس پروگرام میں خطاب کرتے ہوئے بھٹکل تعلقہ ورکنگ جرنلسٹ ایسو سی ایشن کے صدر محمد رضا مانوی نے کہا کہ میڈیا سماج کا آئینہ ہوتا ہے ۔ اس لئے اسے تمام تعصبات کو چھوڑ کر سماجی مفادات کے لئے کام کرنا چاہیے.
انجمن کالج کے شعبہ این ایس ایس کی طرف سے منعقدہ پروگرام میں "سماجی ہم آہنگی میں میڈیا کا کردار" عنوان پر خطاب کرتے ہوئے رضا مانوی صاحب نے کہا کہ سماج میں ہم آہنگی بنائے رکھنا بہت ہی اہم ہوتا ہے ۔ مختلف مذاہب، ذاتوں، ثقافتوں اور زبانوں سے وابستہ لوگوں کو بھائی چارگی کے ساتھ اگر جینا ہے تو پھر ہم آہنگی لازمی ہے ۔ اسے بچائے رکھنے کی بڑی اہم ذمہ داری میڈیا پر عائد ہوتی ہے ۔ سماج کے اندر کیا چل رہا ہے اس کا عکس میڈیا میں دکھائی دیتا ہے۔ میڈیا کےذریعے سماج میں شعوری بیداری لانے، حالات کا خلاصہ پیش کرنے ، بحث و مباحثہ کرنے جیسے پروگرام ہوتے ہیں ۔ یہ پروگرام سماجی ہم آہنگی بچائے رکھنے میں معاون ہوتے ہیں ۔ انہوں نے کہا کہ آج میڈیا جھوٹی معلومات پھیلانے اور تاریخ کو توڑنے مروڑ کر پیش کرنے کے عمل سے سماج میں ایک قسم کی افرا تفری اور بد نظمی پھیلانے کا سبب بن رہا ہے ۔ اس کے نتیجہ میں لازمی طور پر فرقہ وارانہ فساد اور سماجی اور آپسی تصادم کی راہیں کھلتی ہیں۔ اس لئے میڈیا کو ہمیشہ انسانیت کی ترجمانی کا ذریعہ بننا چاہیے ۔
اس موقع پر بھٹکل کی تاریخ پر خطاب کرنے والے کنڑا ساہتیہ پریشد کے شریدر شیٹ نے کہا کہ ہم لوگ روس اور امریکہ کی تاریخ پڑھتے ہیں، لیکن ہمارے اپنے گاوں کی تاریخ کوبھلا دیتے ہیں ۔ جو لوگ تاریخ کا مطالعہ نہیں کرتے ، وہ تاریخ بنا بھی نہیں سکتے ۔ انہوں نے بھٹکل کی تاریخ پر ادبی خطاب میں ملکہ چینّا بھیرایوی کے دور سے لے کر بھٹکل کا نام بھٹکل کیسے پڑا، اس پر تفصیلی روشنی ڈالی۔
انجمن ڈگری کالج کے پروفیسر اور این ایس ایس پروگرام کے آفیسر آر ایس نائیک نے صدارت کی ۔ انجمن ڈگری کالج آفس کے سپرنٹنڈنٹ قمرالدین اور ہڈیل پرائمری اسکول کے ٹیچر راما گوڈا اسٹیج پر موجود تھے ۔