بھٹکل: 29/جون(ایس او نیوز)فصل کی حفاظت اور خود کے تحفظ کے لئے خریدی گئی بندوقوں کے لائسنس کی تجدید ی کارروائی کو مکمل کرنے آج جمعہ کو  خود  اترکنڑا کے ڈپٹی کمشنر ایس ایس نکول بھٹکل پہنچے اورلوگوں کے پاس موجود بندوقوں کے لائسنس کی تجدید کرائی ۔

سرکاری ذرائع نے بتایا کہ بھٹکل تعلقہ میں کل 240افراد کے  پاس بندوقیں ہیں، جس میں 2صنعت کار بھی شامل ہیں۔ ان سبھی لوگوں کو  اپنی فصلوں کے ساتھ ساتھ  اپنی خود کی حفاظت کے لئے  بندوق رکھنے کی اجازت دی گئی ہے۔

جمعہ  کو شہر میں ڈپٹی کمشنر  کی آمد کے پیش نظر تحصیلدار دفتر کے سامنے صبح سے ہی کسان بڑی تعداد میں جمع ہوگئے تھے۔ بندوق لائسنس کی تجدید کے متعلق کسانوں کے لیڈر شری دھر ہیبار نے خیال ظاہر کرتے  ہوئے کہاکہ اس سے قبل بندوق لائسنس کی تجدید بغیر کسی رقم کے کی جاتی تھی  مگر  اب لائسنس کی تجدید کے لئے 1500روپئے فیس رکھی گئی ہے۔ان کے مطابق یہ فیس کسانوں کے لئے یہ ایک بوجھ بن گیا ہے، انہوں نے اس تعلق سے حکومت سے ضروری اقدامات کرنے کا مطالبہ کیا ۔

ان کی بھٹکل آمد کو دیکھتے ہوئے مجلس اصلاح و تنظیم بھٹکل کے وفد نے  بھی ان سے ملاقات کی اور اپنے مسائل حل کرنے کی طرف توجہ دلائی۔

بھٹکل میں ڈپٹی کمشنر نکول نے  فوریسٹ اتی کرم داروں سمیت عوام کے مختلف مسائل اور شکایات کی بھی سماعت کی۔ اس موقع پر تحصیلدار وی این باڈکربھی موجود تھے۔