بھٹکل 21 ستمبر (ایس او نیوز)  ٹریڈ لائسنس نیا بنانے یا پرانے لائسنس کو رینیو کرانے کے لئے میونسپالٹی میں  ایک الگ کاونٹر قائم کرنے سمیت  میونسپالٹی میں لائسنس  کے تعلق سے ہرممکن سہولیات  فراہم کرنے کا مطالبہ لے کر بھٹکل بزنس کمیونٹی (بازار علاقہ) کے  ایک وفدنے بھٹکل اسسٹنٹ کمشنر سے ملاقات کی۔

پیر کو اسسٹنٹ کمشنر مسٹر بھرت  سے گفتگو کرتے ہوئے بھٹکل کے تاجر جناب ثناء اللہ گوائی نے   اسسٹنٹ کمشنر کی جانب سے بعض دکانوں کو لائسنس رینیو نہ کرانے کو لے کر بند کرانے پر   سخت ناراضگی ظاہر کی اور کہا کہ بھٹکل میں کئی لوگ میونسپالٹی کی ملکیت والی عمارتوں میں بھی بغیر لائسنس  کاروبار کررہے ہیں، تعجب اس بات پر ہے کہ ان میں سے اکثر  لوگ میونسپالٹی کو کرایہ بھی نہیں دے رہے ہیں اور غیر قانونی طور پر شراب بھی فروخت کررہے ہیں، انہوں نے اے سی سے مطالبہ کیا کہ اگر دکانوں کو لائسنس نہ ہونے پر  بند کرانا ہی ہے تو پہلے وہاں سے اپنا کام شروع کریں۔ انہوں نے کہا کہ لوگ راستوں کے کنارے  عوام کی چہل پہل والی جگہوں پر بھی  نیچے بیٹھ کر کاروبار کررہے ہیں اور کئی ایک نے غیر قانونی باکڑے ڈال کر اپنا کاروبار کررہے ہیں جن کے پاس نہ لائسنس ہے اور نہ ہی وہ  ٹیکس ادا کرتے ہیں۔

ثناء اللہ گوائی نے اے سی کو یہ بھی بتایا کہ وہ پہلے میونسپالٹی کی جانچ کرے کہ آیا وہاں  نیا لائسنس بنانے یا لائسنس کی تجدید کرانے  اسٹاف صحیح ڈھنگ سے کام کررہے ہیں یا نہیں اور  میونسپالٹی کے کمپوٹرس کام کررہے ہیں یا نہیں کیونکہ اکثر لوگ میونسپالٹی جاکر واپس آرہے ہیں، گوائی  نے اسسٹنٹ کمشنر سے مطالبہ کیا کہ وہ  میونسپالٹی میں پہلے ایک الگ سے کاونٹر بنائیں جہاں لائسنس بنوانے یا لائسنس رینیو کرانے کی مکمل سہولت ہو، اور کوئی لائسنس کے لئے وہاں پہنچے  تو اُن کا کام آسانی سے بن جائے اور میونسپل حکام انہیں یہاں سے وہاں نہ بھیجیں۔

اس موقع پر بزنس کمیونٹی کی جانب سے محمد علی سدی باپا نے میمورنڈم پڑھ کر سنایا جس میں  گذشتہ بدھ کو اے سی کی جانب سے دکانوں کو بند کرائے  جانے کی کاروائی پر ناراضگی ظاہر کرتے ہوئے مطالبہ کیا گیا تھا کہ آئندہ اس طرح کے ا قدامات  نہ اُٹھائے جائیں۔

یاد رہےکہ گذشتہ بدھ کو بھٹکل اسسٹنٹ کمشنر نے میونسپل حکام اور پولس کی مدد سے کئی دکانوں پر پہنچ کر لائسنس اور ضروری کاغذات کی جانچ کی تھی    اور جن دکانداروں نے کاغذات نہیں دکھائے تھے، اُن دکانوں کو  اُسی وقت بند کروایا تھا اور  دکانداروں کو ہی  تالہ ڈالنے کہا تھا اور اُن کے پاس سے  چابیاں حاصل کیں تھیں، تین چار دکانوں کو بند کرانے کے بعد جب لوگوں نے مزاحمت کی تو چابیاںواپس دے کر جلد سے جلد انہیں  اپنے لائسنس بنوانے یا لائسنس  کو رینیو  کرانے کی ہدایت دی تھی۔ واقعے کے بعد بھٹکل مرچنٹ اسوسی ایشن سمیت تنظیم کے حمایت یافتہ میونسپل کونسلروں نے بھی واقعے کی مذمت کی تھی۔

خیال رہے کہ آج بھٹکل کے مختلف ناکوں پر میونسپالٹی کی طرف سے بینرس لگائے گئے ہیں جس میں کاروباری حضرات کو  10 اکتوبر سے پہلے پہلے لائسنس بنانے یا رینیو کرانے کی ہدایت دی گئی ہے۔