بھٹکل:22؍جنوری (ایس اؤ نیوز)تعلقہ کے بینگرے گرام پنچایت حدود کے گونڈرکیری میں کام کئے بغیر ٹھیکدار کو رقم ادا کئے جانے کےمتعلق مقامی عوام نے شکایت پیش کرتے ہوئے جانچ کا مطالبہ کیا ہے۔

گونڈرکیری کے قریب موجود کمپاؤنڈ دیوار  سیلاب کی وجہ سے خراب ہوگئی تھی ، اس کی مرمت کے لئے سیلا ب معاوضےمیں سے 35 لاکھ روپئے منظور ہوئے تھے۔ عوام نے الزام لگایا ہے کہ  کنداپور کے ایک ٹھیکدار نے 37.14لاکھ روپیوں کے لئے ٹھیکہ لے کر 19جولائی 2020کو پروانہ حاصل کیا تھا۔ اب جب کہ 11مہینےہورہےہیں نہ ٹھیکدارمتعلقہ جگہ  دیکھنے گیا اور نہ ہی کام کیاہے البتہ تعمیرات کی رقم انہیں منظور ہونے کا عوام نے الزام لگایا ہے۔

اس سلسلے میں عوام کا کہنا ہےکہ متعلقہ علاقے میں سیکڑوں ایکڑ زرعی زمین ہے، کمپاؤنڈ کی مرمت نہ ہونےکی وجہ سے سیلاب کا پانی کھیتوں میں گھسنے سے  فصل برباد ہوتی ہے۔ موسم گرما میں کیچڑ ہونےکی وجہ سے زراعت ممکن نہیں ہوتی ۔ اس تعلق سے کئی مرتبہ ہم نے رکن اسمبلی سمیت کئی عوامی نمائندوں کو دیوار کی مرمت کے لئے اپیل کی تھی ، مگر اب تک کوئی فائدہ نہیں ہواہے۔

15برس پہلے گرام پنچایت کی جانب سے کمپاؤنڈ دیوار کی تعمیر ہوئی تھی  اس کے بعد کوئی تعمیراتی کام نہیں ہواہے۔ ایک سال پہلے چھوٹی آب پاشی محکمہ کی طرف سے دیوار کی مرمت کے لئے رقم منظور ہونے کی  ہمیں کوئی خبر نہیں ہے۔ لیکن ٹھیکدار کو رقم اداہونےکے متعلق ہمیں پتہ چلاہے، یہاں سوال یہ ہے کہ تعمیراتی کام کئے بغیر ہی بِل کی ادائیگی کیسے ہوئی ؟

عوام کمپاؤنڈ دیوار کی مرمت کے لئے پچھلے کئی برسوں سے مطالبہ کرتے رہے ہیں، لیکن سیکڑوں ایکڑ پر پھیلی فصل کو نکالنا ممکن نہیں ہورہاہے۔ عوام نے مطالبہ کیا ہے کہ تعمیراتی کام کئے بغیر جنہیں بل ادا کیاگیا ہے ان سب کے خلاف سخت کارروائی کی جائے۔ جمعرات کو گونڈرکیری میں جمع ہونے والے عوام نے اس سلسلےمیں جانچ کا مطالبہ کیا ہے۔ اس موقع پر گرام پنچایت ممبر سوشیلا گونڈا، لکشمی گونڈا، دیوویندر گونڈا، رام گونڈا، سنی گونڈا، گوئیدا گونڈا، منگلی گونڈا، بڈیا گونڈا، ایرما گونڈا وغیرہ موجود تھے۔