بھٹکل :2 جنوری  (ایس اؤ نیوز ) یکم جنوری 2024کو انجمن کے عثمان حسن ہال میں منعقدہ اسلامیہ اینگلو اردو ہائی اسکول کے سالانہ جلسےمیں سال رواں کا باوقار ایوارڈطلائی تمغہ ’وقارِ انجمن‘ اسکول کےہونہار متعلم عبدالسمیع ابن اکبر علی بنگالی؛کو دیا گیا ہے۔ جب کہ  اسکول کے متعلمین محمد یاسین ابن محمد سید اور تمیم الحق ابن عبدالغنی کو رنرس آپ قرار دیاگیا ہے 

سالانہ جلسے میں انجمن کے الومنی ، بھٹکل بلاک ایجوکیشن آفیسر (بی ای اؤ) وی ڈی موگیر نے مہمان خصوصی کے طورپر انجمن کے متعلق فخریہ کلمات ادا کرتےہوئے طلبا سے کہاکہ ادارے کی جانب سے دی گئی تعلیم کا طلبا بہتر استفادہ کرتےہوئے زندگی کی اونچائی کو حاصل کریں۔ انہوں نے طلبا کو زیادہ سے زیادہ علمی معلومات کا ذخیرہ جمع کرنے اور سخت محنت کے ذریعے اپنے خوابوں کو پورا کرنے کی طرف توجہ  دینے کہا۔ انہوں نے ایس ایس ایل سی کو تعلیمی زندگی کا ایک اہم موڑ بتاتے ہوئے کہاکہ طلبا اجتماعی مطالعہ کے ذریعے اپنے علم میں اضافہ کریں اور اس طرح سے مشکلات کو آسانی سےحل کرنےکی ترکیب بتائی ۔

انجمن انسٹی ٹیوٹ آف ٹکنالوجی اینڈ مینجمنٹ (اے آئی ٹی ایم) کے پرنسپل ڈاکٹر فضل الرحمن نے اعزازی مہمان کے طورپر مستقبل کو روشن بنانے کے متعلق منصوبہ بند طریقے سے محنت کرنےکی طرف طلبا کو توجہ دلائی ۔ انہوں نے طلبا کی کامیابی میں والدین کے رول کو اہم قرار دیتےہوئے کہاکہ والدین طلبا کو اپنی زندگی کی منزل طئے کرنے میں آزادی دیں اور ان کی رہنمائی کریں۔ عام طورپر صحیح رہنمائی نہیں ہونےکی وجہ سے طلبا پیچیدگی کا شکار ہوکر تعلیمی مستقبل کو ہی خراب لیتے ہیں اسی لئے والدین، اساتذہ اور دیگر ماہرین سے صلاح و مشورہ کرتےہوئے اپنی اہلیت و قابلیت کی بنیاد پر اپنی منزل طئے کرنے کی ہدایت کی۔ انجمن کے نائب صدر دوم محمد صادق پلور نے جلسہ کی صدارت کی۔

جلسے میں اسکول کی سطح پر تعلیمی ، ثقافتی اورکھیل مقابلوں میں کامیاب ہونےو الے طلبا کےدرمیان انعامات تقسیم کئےگئے۔ اس موقع پر 29برسوں سے طلبا کی کھیل کے میدان رہنمائی کرنے والے پی ای ٹیچر محمد فاروق غنی ،پچھلے 27برسوں اردو اور دینیات کے استاد  کی حیثیت بہترین تدریسی خدمات انجام دینےوالے مولوی محمد اشرف معلم اور 15سال سے دینیات استاد کی حیثیت سے خدمات انجام دینے والے مولوی شاہین قمر کی شال پوشی کرتےہوئے تہنیت کی گئی ۔

محمد عدنان نواب کی تلاوت قرآن سے جلسہ کا آغاز ہوا۔ عاطف قاضی  نے ہدیہ نعت پیش کی۔ اسکول بورڈ کے سکریٹری سعداللہ رکن الدین نے استقبالیہ کلمات پیش کئے، ریاضی کے استاد عارف الزماں نے مہمانوں کا تعارف پیش کیا۔ عبدالسمیع اور ساتھیوں نے اسکول کا ترانہ پیش کیا۔ اسکول کے صدر مدرس شبیر احمد دفعدار نے اسکول کے سالانہ  رپورٹ کی خواندگی کی۔ جب کہ اردو کے استاد مولانا عبدالحفیظ نے نظامت کے فرائض انجام دیتےہوئے شکریہ کلمات ادا کئے۔ ڈائس پر انجمن کے ایڈیشنل جنرل سکریٹری اسحاق شاہ بندری ، انجمن انتظامیہ کے رکن یاسین عسکری اور مولانا امین رکن الدین وغیرہ موجود تھے۔