میرے دور میں منظور کیے گئے منصوبوں پر عمل اب شروع ہوا ہے۔بھٹکل کے سابق رکن اسمبلی منکال وئیدیا کا بیان
بھٹکل 11/فروری (ایس او نیوز) بھٹکل کے سابق رکن اسمبلی منکال وئیدیا نے در پردہ موجودہ رکن اسمبلی پر نشانہ سادھتے ہوئے کہا ہے کہ اب جو تعمیری منصوبوں پر عمل کیا جارہاہے، وہ ان کے اپنے دور میں منظور کیے گئے منصوبے ہیں، جنہیں نئے منصوبے بناکر پیش کیا جارہا ہے۔اور عوام اس بات سے پوری طرح واقف ہیں۔
منکال وئیدیانے مرڈیشور میں منعقدہ کانگریس پارٹی کے اجلاس سے خطاب کرتے ہوئے یہ بات کہی۔ انہوں نے کہا کہ میں نے اپنی میعاد کے دوران مکمل غیر جانبداری اور بغیر کسی تفریق کے ساتھ کام کیا،لیکن آج کانگریس کے کارکنان کو تکلیف دی جارہی ہے۔ان کے لئے رکاوٹیں پیدا کی جارہی ہیں۔ انہوں نے پارٹی اراکین سے کہا کہ ”میں آپ لوگوں کے ساتھ کھڑا ہوں، آپ کو کسی سے ڈرنے کی ضرورت نہیں ہے۔“ منکال وئیدیا نے پوچھا کہ میری میعاد کے دوران غیر معیاری تعمیری کام ہونے کا الزام لگانے والے اب کیا کہیں گے؟
بھٹکل کانگریس کے صدر سنتوش نائک نے کہا کہ کانگریس پارٹی اس وقت مشکل دور سے گزر رہی ہے۔لیکن پارٹی کے اراکین اور کارکنان کو ہمت نہیں ہارنی چاہیے۔ کانگریس کے بعض لیڈران اور کارکنان کاکہنا تھاکہ بی جے پی والے تمام تعمیری منصوبوں پر عمل درآمد اپنے دور میں ہی ہونے کی بات کہتے ہوئے غلط پروپگنڈا کررہے ہیں اور کانگریس سے منتخب عوامی نمائندے اس کی تردید کرنے اور صحیح معلومات عوام تک پہنچانے کی کوشش نہیں کررہے ہیں۔ اگر معاملہ یونہی چلتا رہا تو پھر اس سے کانگریس پارٹی کو مزید بھاری نقصان ہوگا۔ کانگریس اقلیتی مورچے کے ضلع صدر عبدالمجید، نارائن نائک وغیر ہ نے پارٹی اراکین سے خطاب کیا۔
اس موقع پرضلع پنچایت صدر جئے شری موگیر، تعلقہ پنچایت صدر ایشور نائک، ضلع پنچایت رکن سندھو بھاسکرنائک، تعلقہ پنچایت نائب صدر رادھا اشوک وئیدیا،اور پارٹی کے کئی اہم لیڈران اسٹیج پر موجود تھے۔